Ilustrasaun Karate-do. Imajen/Espesiál

DILI, 21 jullu 2021 (TATOLI) – Sekretáriu Jerál Federasaun Karate-do Timor-Leste (FKTL), António Carlos de Araújo, hateten maioria atleta hosi Karate-do simu ona vasina ho nune’e iha semana rua ba kotuk deside re-ativa ona treinamentu iha kapitál Dili.

“Semana rua ba kotuk, ami deside re-ativa treinamentu ba atleta sira iha Dili laran, maibé kumpre nafatin regra saúde públiku,” António Carlos de Araújo hateten ba Agência Tatoli iha Jináziu Dili, kuarta ne’e.

Nia dehan, dojan (ramu) ne’ebé iha Dili laran re-ativa ona hamutuk haat (4) mak hanesan, iha sentrál treinu iha Jináziu Dili fahe ba A-B, Delta, Becora no Masin Lidun, Tasi Tolu.

Re-ativa treinamentu ba atleta Karate-do hirak ne’e hodi rekupera hikas prestasaun atleta sira nian durante fulan haat (4) resin tanba pandemia COVID-19.

Ba dojan sira iha munisípiu,  Federasaun Karate-do Timor-Leste hasai ona karta hodi bele re-ativa hikas atividade iha tempu besik, nune’e bele prepara ba ezame ne’ebé sei hala’o dezembru mai ne’e.

Iha fatin hanesan, atleta Karate-do, Jenifer da Costa hosi dojan sentrál hateten, sira-nia parte kontente bele hala’o hikas treinamentu tanba tempu naruk la hala’o atividade.

“Antes ne’e, ami labele hala’o treinamentu tanba pandemia COVID-19, maibé agora book an fali bele hasae fali ami-nia prestasaun,” Jenifer da Costa hateten.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here