Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (21/07). Imajen TATOLI/Egas Cristóvão

DILI, 21 jullu 2021 (TATOLI)—Governu liuhosi reuniaun Konsellu Ministru (KM) delibera hodi propoin ba Prezidente Repúblika (PR), Francisco Guterres ‘Lú Olo’ hodi renova Estadu Emerjénsia (EE) da-XVI ba loron 30 tan atu permite suspensaun direitu no garantia fundamentál balun.

EE antes ne’e ba da-XV abranje territóriu nasionál tomak no vigora hosi tuku 00:00 loron 02 jullu to’o tuku 23:59 loron 31 jullu 2021.

“Desizaun ne’e hafoin halo análiza aprezentasaun kona-ba pontu situasaun epidemiolójika nasionál, hosi Sala Situasaun, Sentru Integradu Jestaun Krize (CIGC, sigla portugés),” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha Palásiu Governu, kuarta ne’e.

Governu mantein kauza determinante sira ne’ebé justifika ona deklarasaun EE no ninia renovasaun sira atubele evita no neutraliza risku propagasaun vírus, nune’e bele proteje saúde públika no kapasidade resposta Sistema Nasionál Saúde.

Enkuantu, iha medida ezekusaun EE da-XV nian prevee katak, ema hotu ne’ebé hakarak tama iha Timor-Leste tenke aprezenta komprovativu rezultadu negativu teste detetasaun COVID-19, ne’ebé ninia antiguidade la liu loron-lima.

Medida ezekusaun iha EE ne’ebé sei vijente hela katak, sé maka simu vasina kompleta no mai ka liuhosi país sira ne’ebé identifika ona variante Delta SASR-CoV-2 (variante vírus foun), tenke kumpre kuarentena loron-lima, enkuantu sé maka la simu vasina kompleta, kontinua kumprr kuarentena loron-14.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here