Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (21/07). Imajen TATOLI/Egas Cristóvão

DILI, 21 jullu 2021 (TATOLI)—Bazeia ba Rezolusaun Governu númeru 75 /2021 loron 31 maiu, ne’ebé aprova alterasaun daruak Rezolusaun Governu númeru 32/2021 loron 09 abríl, deklarasaun Estadu Kalamidade ne’ebé hahú iha loron 04 abríl sei ramata iha loron 08 agostu.

“Atu kontinua presiza estensaun maibé kuandu laiha estensaun katak termina ona. Deklasaun Estadu Kalamidade hanesan mekanizmu ida ne’ebé Governu uza atu fasilita kobertura protesaun abrigu legál ba atuasaun no fornese servisu ba sidadaun iha kontestu kalamidade, tanba ne’e maka Governu presiza halo deklarasaun,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha Palásiu Governu, kuarta ne’e.

Deklarasaun Estadu Kalamidade antes ne’e tanba haree ba akontesimentu hanesan Siklone Tropikál Seroja hodi rezulta inundasaun iha loron 04 abríl 21, ne’ebé rezulta infraestrutura públika no privada barak mak hetan estragu.

Notísia relevante: Governu renova deklarasaun Estadu Kalamidade ba loron 60

Tuir Portavós Governu, iha buat balun tuir lei presiza halo estensaun ka presiza halo deklarasaun ruma atu kontinua ka la kontinua.

“Maibé ba hirak ne’ebé kuandu aprova ho ninia termu validade liu ona, automátikamente la estende, ne’ebé la presiza tan halo desizaun la estende tanba deklarasaun ne’e rasik ninia validade tempu ne’e konta tiha ona,” Ministru esplika.

Jornalista : Antónia Gusmão

Editora     : Julia Chatarina 

HAKEREK NO HATÁN

Please enter your comment!
Please enter your name here