Produtu lokál iha Loja Agrikultór. Imajen TATOLI/Florêncio Miranda Ximenes

DILI, 21 jullu 2021 (TATOLI)–Diretór  Nasionál Agro-Komérsiu no Kooperasaun Setór Privadu hosi Ministériu Agrikultura no Peska (MAP),  Fernando Amaral,  hateten, durante implementasaun Serka Sanitária no Konfinamentu Obrigatóriu funsionamentu Loja Agrikultura la’o normál.

“Durante ne’e, ha’u rasik hamutuk ho funsionáriu Loja Agrikultura rua iha Dili, Meimart Fatuhada no Timor Plaza, ami ho karrreta loja nia ba sosa modo,” Diretór  hateten ba Agência TATOLI, iha ninia knaar fatin, MAP Comoro, kuarta ne’e.

Modo sira ne’ebé maka komunidade lori mai pontu entrada, parte Loja Agrikultura hola, nune’e rai iha loja atu fasilita  komunidade sira bele responde ba nesesidade iha situasaun difísil.

“Diresaun ne’e la nonok, maibé ami buka meiu hodi halo kooperasaun ho grupu produtór foos-rai no aifuan hosi Viqueque, Baucau, Ainaro, Maubisse, Bobonaro Ermera no sira seluk hodi lori produtu mai tau iha Loja Agrikutura iha Dili,” nia akresenta.

Daudaun ne’e, foos-rai no aifuan iha Loja Agrikultura la sufisiente.

“Foin daudaun semana kotuk liubaá produtór sira hatama tan tonelada tolu, ida-ne’e ha’u hanoin sufisiente ba ita-nia komunidade sira iha Dili ne’ebé hakarak konsumu  foos-rai,” nia hatutan.

Jornalista : Natalino Costa    

Editora     : Julia Chatarina

HAKEREK NO HATÁN

Please enter your comment!
Please enter your name here