Prezidente CNJTL, Maria Dadi Soares Magno. Imajen Tatoli/Egas Cristovão.

DILI, 20 jullu 2021 (TATOLI)—Prezidente Konsellu Nasionál Juventude Timor-Leste (CNJTL-sigla portugés), Maria Dadi Magno, apresia ho inisiativa Parlamentu Nasionál kona-ba projetu-lei protesaun ba labarik no joven iha perigu maibé husu reprezentante povu sira tenke halo konsultasaun ho kle’an.

Notísia Relevante: MSSI rekomenda espesífika artigu haat hosi projetu-lei protesaun labarik ba PN

Prezidente CNJTL fó hanoin ne’e relasiona ho komisaun F ne’ebé trata asuntu saúde, seguransa sosiál no igualdade jenéru, atu halo konsultasaun kle’an nune’e elaborasaun proteje duni labarik sira iha Timor-Leste.

“Ha’u hanoin asuntu lei ba labarik nian, Parlamentu Nasionál tenke halo konsultasaun kle’an nune’e bele proteje labarik sira tanba ita presiza tebes baze legál ida atu labarik sira mós iha lian,” Maria Dadi informa ba Ajénsia TATOLI, iha nia kna’ar-fatin, Palapasso, kuarta ne’e.

Nia husu reprezentante povu tenke tetu no halo analiza didi’ak ba situasaun ho nia kategória sira hanesan labarik feto no mane, labarik defisiénsia, labarik orfonatu sira, labarik sira-ne’ebé inan-aman husik no labarik ne’ebé moris iha risku nia-laran.

“Ita tenke define didi’ak, tanba todan ne’ebé halo protesaun ne’e la hanesan, ne’e tenke aprofunda atubele duni no sente rasik katak lei ne’e proteje duni ba labarik sira, liu-liu ba labarik defisiénsia,” Prezidente CNJTL ne’e fó hanoin.

Nia hatutan, labarik sira iha orfonatu ne’ebé Estadu investe ba hahán no moris saudável entaun edukasaun no saúde importante maibé tenke iha fundasaun ne’ebé foka ho seriedade. Nune’e labarik defisiénsia sira la sente katak sira iha kotuk maibé hotu-hotu iha direitu no devér hanesan ho sidadaun seluk.

Prezidente CNJTL konsidera inisiativa hosi Parlamentu Nasionál ne’e di’ak tebes maibé importante tenke sensibiliza ba sosiedade, nune’e sosiedade mós iha hanoin katak órgaun lejizlativa aprova lei ne’ebé presiza duni tau atensaun ba labarik sira-nia direitu moris loron-loron nian.

“Ita mós hatene katak iha lei tanba iha problema ne’ebé Estadu tenke hola responsabilidade atu hateke ho seriedade ba situasaun sira-ne’e. Tanba ne’e, parte relevante ne’ebé toma konta ba asuntu labarik no joven tenke halo advokasia oinsá dudu lalais no bele aprova lalais, bainhira aprova tenke sensibiliza uluk lai,” nia dehan.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here