Sekretáriu Jerál FFTL, Nélio Isaac Sarmento. Imajen Tatoli/António Gonçalves

DILI, 21 jullu 2021 (TATOLI) –Timor-Leste iha oportunidade boot partisipa iha jogu nivel internasionál AFC U-23 Asian Cup 2022.

Iha jogu ne’e  Timor-Leste monu iha grupu H hamutuk ho Singapura, Filipina no Korea Sul no maski iha grupu ne’e, Timor-Leste sei hasoru ekipa ne’ebé bele dehan jigante iha Ázia liu-liu Korea, maibé istória hatudu ona ba Timor-Leste iha 21 jullu 2017 iha Estádiu Ho Chi Minh Korea ba “Kualifikasaun piala Ázia” rezultadu empata 0-0.

Sekretáriu Jerál Federasaun Futeból Timor-Leste (FFTL), Nelio Isaac Sarmento, hateten Timor-Leste sei hatudu jogu di’ak iha Asian Cup 2022 ne’ebé sei hala’o outubru mai ne’e iha Singapura.

“Hasoru Filipina ho Singapura buat baibain tanba ita no ita bele manan ona sira iha jogu saida de’it, susar uitoan mak Korea, maibé istória hatudu ona, ne’ebé orientasaun ami nian ba treinadór no jogadór tenke sériu hodi hatudu jogu ne’ebé di’ak,” Nelio Isaac Sarmento hateten hodi responde Agéncia Tatoli iha edifísiu FFTL Dili, kuarta loraik ne’e.

Nia dehan, mehi FFTL nian oinsá mak ekipa Timor-Leste bele sai ekipa runer up  iha grupu H.

Iha sorin seluk treinadór selesaun nasionál senior no U-23, Fabio Joaquim Maciel da Silva hateten, prontu kumpre saida mak FFTL orienta hodi fó treinamentu ba jogadór sira.

Tuir oráriu Timor-Leste sei joga primeiru ho Singapura iha 27 outubru, joga da-ruak kontra Korea 29 outubru no jogu da-toluk kontra Filipina 31 outubru. 2021

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here