Membru arte marsiál na'in-rua hosi PSHT hamoos hela símbolu sira arte marsiál ho arte rituál sira nian ne’ebé marka iha parede sira iha kapitál Manufahi, kuarta (21/07/2021). Imajen/Espesiál

DILI, 21 jullu 2021 (TATOLI)-Membru grupu arte marsiál no arte rituál iha Munisípiu Manufahi, kuarta ne’e, kontinua organiza malu halo limpeza jerál iha  kapitál Munisípiu Manufahi.

Notísia Relevante : KRAM Sosializa Regra Arte Marsiál Ba PSHT, IKS ho KORK

Administradór Munisípiu Manufahi, Arantes Isaac Sarmento, ne’ebé  hola parte mós iha atividade ne’e hateten, membru grupu arte marsiál ho arte rituál sira halo limpeza jerál, inklui hamoos símbolu sira arte marsiál ho arte ritual sira nian ne’ebé marka iha parede sira iha Manufahi bazeia ba konkordánsia  enkontru ne’ebé halo iha semana kotuk hodi trasa planu ida antes Governu reativa arte marsiál dahuluk.

“Membru grupu arte marsiál ho arte rituál hamutuk 500 ne’ebé hola parte iha atividade limpeja jerál ne’e mai hosi  KORKA, PSHT, IKS KERA-SAKTI, Colimau 200 no Sete-Sete (77),” informa Arantes Isaac Sarmento ba Agência Tatoli liuhosi telefónika, kuarta ne’e.

Munisípiu Manufahi inisiativa organiza membru grupu arte marsiál ho arte rituál hahú hamoos símbolu arte marsiál sira iha didin lolon, tanba ho objetivu katak iha arte marsiál ne’e hanesan arte ida ne’ebé sira tuir tenke respeita nune’e ba oin sira hamutuk hodi kontribui pás ba nasaun.

Hola parte iha atividade ne’e mós Komandante Polísia Nasionál Timor-Leste (PNTL) Munisípiu Manufahi no Komisaun Reguladór Arte Marsiál (KRAM) Munisípiu Manufahi nian.

Jornalista       : Arminda Fonseca

Editór             : Francisco Simões 

HAKEREK NO HATÁN

Please enter your comment!
Please enter your name here