Diretór Agro-Komérsiu no Kooperasaun Setór Privadu hosi MAP, Fernando Amaral. Imajen TATOLI/Cipriano Colo

DILI, 21 jullu 2021 (TATOLI)—Diretór Nasionál Agro-Komérsiu no Kooperasaun Setór Privadu hosi Ministériu Agrikultura no Peska (MAP), Fernando Amaral, hateten, daudaun ne’e laiha armazen sufisiente atu akumula foos-rai ne’ebé sosa hosi agrikultór sira iha munisípiu.

“Ami iha armazen ida de’it iha parte Hudi-laran, maibé la sufisiente atu rai foos-rai ho kuantidade barak liután,” Diretór informa ba Agência TATOLI, iha ninia knaar fatin, MAP Comoro, kuarta ne’e.

Tuir Dirijente ne’e, durante ne’e MAP hakarak sosa foos-rai barak maibé armazen mak sai difikuldade, tanba ne’e bainhira atu sosa sei sukat kapasidade armazen.

“Dala barak foos-rai iha Loja Agrikultura menus, tuir loloos la menus maibé tanba ita laiha armazen maka labele sosa foos-rai barak,” nia akresenta.

Agrikultór balun hosi munisípiu ne’ebé halibur malu hanesan grupu no asosiasaun hakarak hatama foos-rai mai Dili ho kuantidade tonelada 30.

“Difikudade maka fatin tanba foos-rai labele rai kleur iha fatin arbiru maibé nia tenke iha fatin apropriadu ida,” nia hatutan.

Tanba ne’e, MAP husu ba parte Sentru Lojístika Nasionál (CLN, sigla portugés) atu kolabora hamutuk sosa foos-rai hodi rai iha armazen nasionál.

Jornalista : Natalino Costa    

Editora     : Julia Chatarina

HAKEREK NO HATÁN

Please enter your comment!
Please enter your name here