AFSTL realiza workshop hanesan parte hosi avaliasaun ba prestasaun servisu saúde públika hodi kombate COVID-19 iha Baucau, ne'ebé realiza iha salaun PNTL Baucau, Villa nova, kuarta (21/07). Imajen TATOLI/Natalino Belo

BAUCAU, 21 jullu 2021 (TATOLI)—Diretór Asosiasaun Fuan Saudável Timor-Leste (AFSTL) munisípiu Baucau, Fidélio António da Costa, identifika katak durante ne’e informasaun ba komunidade iha área rurál kona-ba COVID-19 no kampañ vasinasaun laduun la’o di’ak, nune’e ema barak mak seidauk komprende.

“Informasaun barak mak durante ne’e laduun la’o klaru, entaun ami esforsu atubele door to door no enkoraja komunidade atu tuir kampaña vasinasaun iha munisípiu Baucau,” Diretór AFSTL, hateten iha aula Komandu PNTL munisípiu Baucau, Villa nova, kuarta ne’e.

Notísia relevante: Abitante 10.449 simu ona vasina AstraZeneca iha Baucau

AFSTL realiza workshop ida hodi halo avaliasaun ba prestasaun servisu saúde públika hodi kombate COVID-19 iha Baucau.

Nune’e, asosiasaun ne’e serbisu hamutuk ho saúde munisipál hodi kontinua disemina informasaun ho loloos no kredível ba komunidade, nune’e bele komprende didi’ak kona-ba prevensaun COVID-19 no partisipa másimu iha kampaña vasinasaun.

Iha parte seluk, asosiasaun husu ba ekipa Sala Situasaun, Sentru Integradu Jestaun Krize (CIGC, sigla portugés) atu kolabora di’ak liután ho autoridade lokál iha ámbitu kombate COVID-19.

“Husu atu hadi’a di’ak liután prestasaun servisu entre Sentru Integradu Jestaun Krize Baucau hamutuk ho autoridade lokál, Prezidente Autoridade Munisipál (PAM), Polísia Nasionál Timo-Leste (PNTL) no FALINTIL-Forsa Defeza Timor-Leste (F-FDTL) iha Baucau, nune’e bele serbisu hamutuk nu’udar esforsu koletivu hodi kombate COVID-19 iha rejiaun ne’e,” nia akresenta.

AFSTL nu’udar Organizasaun Naun Governamentál (ONG) iha área saúde, ne’ebé destaka funsionáriu hamutuk 15 iha Baucau, kompostu hodi 10 apoia CIGC iha munisípiu, ne’ebé mak na’in-haat nu’udar apuramentu, jestaun no admistrasaun, na’in-lima iha portaun entrada Vemasse hodi tau-matan iha área vizilánsia epidemiolojia no na’in-lima seluk halo monitorizasaun no avaliasaun ba kampaña vasinasaun iha Baucau.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here