Majid Al-amal munisípiu Baucau. Imajen TATOLI/Natalino Belo

BAUCAU, 20 jullu 2021 (TATOLI)—Iha ámbitu selebrasaun Idul Adha 1442, Prezidente Konsellu Nasionál Islámiku Timor-Leste (CONISTIL, sigla portugés) munisípiu Baucau, Syamsul Bahri Ribeiro, felisita komunidade musulmana iha Timor-Leste no husu atu líder sira fó liman ba malu harii nasaun.

“Ho selebrasaun Idul Adha, ita husu líder sira unidade atu harii povu no nasaun ida-ne’e, labele iha diferente étnia,” Prezidente CONISTIL informa iha ninia knaar fatin, Villa nova, tersa ne’e.

Prezidente CONISTIL munisípiu Baucau, Syamsul Bahri Ribeiro. Imajen TATOLI/Natalino Belo

Tuir líder islámiku ne’e, nasaun atu avansa ba oin, importante liu mak ema hotu rona no simu malu, maski hanoin la hanesan.

“Promesa hirak ne’ebé halo ho povu, presiza realiza molok tama ba eleisaun Prezidensiál tinan 2022 no Parlamentár 2023. Importante mak interese nasaun a’as liu do que partidária no privadu, hadomi nasaun hanesan ita-an rasik,” Syamsul subliña.

Enkuantu, nia konsidera, povu tenke respeita líder sira maski kapasidade la hanesan, tanba povu rasik mak hili líder sira atu ukun.

Prezidente CONISTIL dehan, selebrasaun Idul Adha tinan ne’e iha Baucau diferente ho tinan hirak antes tanba laiha movimentu kauza hosi pandemia, entaun karau ne’ebé hetan ajudu hosi parseiru dezenvolvimentu sira, diretamente aloka ba komunidade musulmana iha munisípiu seluk hanesan Lautém no Viqueque.

Komunidade musulmana ko’a na’an karau iha ámbitu selebrasaun loron Idul Adha 1442, iha Majis Al-amal, villa nova, Baucau, tersa (20/07). Imajen TATOLI/Natalino Belo

“Ajudu mai hosi Malaysia, Singapura no Indonézia, balun ami labele simu tanba situasaun agora la hanesan uluk, dalaruma haruka mai tarde no balun diretamente mai sosa, entaun ami simu tuir kondisaun,” nia akresenta.

Selebrasaun Idul Adha 1442 iha munisípiu Baucau, komunidade musulmana oho karau neen no bibi lima, ne’ebé sei fahe ba kada uma kain kilograma rua, inklui viziñu sira ne’ebé hela besik Majid Al-amal Baucau.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here