Komunidade Musulmanu Timor-Leste selebra loron Idul Adah Mubarak 1442 iha Meskita An-Nur Dili, (20/07). Imajen Tatoli/Francisco Sony.

DILI, 20 jullu 2021 (TATOLI)—Prezidente Repúblika, Francisco Guterres Lú Olo, felisita komunidade musulmanu Timor-Leste no mundu ne’ebé selebra Idul Adha Mubarak 1442H 20 jullu 2021.

Notísia Relevante: Tersa, musulmanu TL selebra loron Idul Adha Mubarak 1442

Xefe Kaza Sivíl Prezidente Repúblika, Francisco Maria de Vascocelos, halo leitura ba Mensajen Prezidente Repúblika iha ambitu selebra loron Idul Adah Mubarak 1442. Iha Meskita An-Nur Dili, (20/07). Imajen Tatoli/Francisco Sony.

“Ho Estadu tomak no ha’u-nia família nia naran, hato’o ami-nia felisitasaun kle’an ba ita-boot sira,” Prezidente Repúblika hateten liuhosi diskursu ne’ebé lee hosi Xefe Kaza Sivil Prezidente Repúblika, Francisco Maria de Vasconcelos, iha Meskita An-nur, Kampung Alor, Dili, tersa ne’e.

Idul Adha fó sentidu bo’ot tebes ba komunidade musulmana iha Timor-Leste no iha mundu oinsá halo sakrifísiu no hasa’e sira-nia fiar ba ALLAH hodi hametin relasaun entre ema ho ema no hasa’e kualidade moris liuhosi asaun sosiál sira.

Iha loron sakrifísiu ne’e, liu-liu iha pandemia COVID-19 ne’ebé fó ameasa ba vida umana iha Timor-Leste, musulmanu iha Timor-Leste hatudu nafatin sentidu solidariedade ba ema sira-ne’ebé vulnerável liu.

Komunidade Musulmanu Timor-Leste selebra loron Idul Adah Mubarak 1442. Iha Meskita An-Nur Dili, (20/07). Imajen Tatoli/Francisco Sony.

“Ha’u aproveita oportunidade ida-ne’e atu hasa’e liután valor hirak ne’ebé komunidade musulmana kaer metin iha selebrasaun ida-ne’e hanesan solidariedade, jenerozidade no karidade ba ita-nia kompatriota vulnerável sira. Valor sira-ne’e boot no aas tebes ba koezaun nasionál no sosiál tanba lori ita timor-oan sai ema ida de’it no Povu ida de’it,” Prezidente Repúblika hateten.

Nu’udar timor-oan hatudu sentimentu forte no nakonu ho valór hosi musulmanu sira-nia krensa (fiar) hodi halibur malu ho hafahe ba ema hotu-hotu nu’udar sinál umanu.

Prezidente Repúblika respeita no sai testemuñu ba timor-oan nia espiritu toleránsia relijioza katak timor-oan hatene simu malu, respeita ida-idak nia fiar tuir Konstituisaun Repúblika Demokrátika Timor-Leste haruka.

“Ha’u hasa’e valor hirak ne’ebé relijiaun musulmana tane no hametin no ha’u fiar katak ita hotu sei haburas no haklaken ba beibeik espíritu toleránsia no konvivénsia relijioza ida-ne’e iha ita nia Nasaun Timor-Leste,” nia dehan.

Nu’udar Prezidente Repúblika sei tane as nafatin valor sira-ne’e no hamutuk ho musulmanu sira no komunidade relijioza sira seluk, hamutuk sei fó liman ba malu nafatin nu’udar Povu ida de’it hodi serbí Rai doben Timor-Leste.

Sakrifísiu ne’ebé komunidade musulmana halo iha loron importante ne’e mak sosa no oho animál sira hanesan bibi no oho karau hamutuk 15 hodi fahe ba maluk sira-ne’ebé presiza liu-liu ba sira-ne’ebé   susar hetan ai-han iha moris loro-loron nian.

Aktu ida-ne’e hasa’e liután muslmanu sira-nia asaun konkreta hodi hakat ba dalan foun moris nian ne’ebé nafatin mai ho valór fiar ba relijiaun, unidade, fraternidade no sentidu solidariedade.

Vise Prezidente komunidade Musulmanu Timor-Leste, Abdulah I nacio A. Soares, hateten komemorasaun ida-ne’e sai hanesan tradisaun komunidade Musulmanu nian hodi hasa’e fiar ba Nai Maromak.

Vise-Prezidente Komunidade Musulmanu Timor-Leste, Abdulha Inacio A. Soares. Imajen Tatoli/Francisco Sony.

“Ohin ami halo komemorasaun eventu liuhusi ami-nia profeta Abrão, ida-ne’e sai hanesan tradisaun ona tanba iha momentu ne’ebá ita-nia profeta Abrão Alai Asalam hetan ne’ebé maka’as hosi Nai Maromak Allah Subahana Allah Wata Alllah, oinsá atu sakrifika nia-oan mane ida ho naran Profeta Ismael,” nia dehan.

Kada tinan komunidade musulmanu selebra komemorasaun eventu Idul Adha ka liuhosi profeta Abrão Allah Assalam hanesan babain komesa halibur komunidade sira no mós liuhosi órgaun soberania Timor-Leste.

Vise Prezidente komunidade Musulmanu ne’e fó mensajen ba komunidade musulmanu sira atu oinsá bele banati nafatin dutrina hosi profeta Abrão Allah Asalam no atu oinsá bele fiar metin hodi habelar nafatin.

Nune’e mós presiza respeitu toleránsia fielmente iha situasaun ida-ne’ebé iha unidade no pás tanba presiza kria situasaun ne’ebé unidu, diversidade iha nasaun Timor-Leste nia laran.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here