DILI, 20 jullu 2021 (TATOLI)—Vise-Prezidente Parlamentu Nasionál, Maria Angelina Sarmento, hateten Parlamentu Nasionál kria ona grupu joven parlamentár ba deputadu joven sira-ne’ebé idade 45 mai kraik.
Notísia Relevante: Joven sira tenke sai ajente ba mudansa
“Objetivu hosi kria grupu joven parlamentár ida-nee atu PN hanesan lejisladór no fiskalikadór tenke asegura katak lei sira ne’ebé Governu propoin mai PN tenke iha duni ba joven sira-nia partisipasaun nomós polítika, programa no orsamentu tenke refleta nesesidade juventude sira-nian,” Maria Angelina Sarmento liuhosi nia mensajen iha konferénsia nasionál ho tema “Kontinua Hametin no Haburas Ezisténsia Organizasaun CNJTL ho Vizaun Estadista no Tane as Prinsipiu Estadu Direitu Demokrátiku iha Prosesu Dezenvolvimentu Nasionál,” iha Salaun Katedral Bebora, Dili, tersa ne’e.
Parlamentu Nasionál hanoin hela atu halo karik posível hanesan mós organizasaun feto sira halo ona ba sira-nia advokásia ba PN iha tinan hirak liubá, ba lei kona-ba eleisaun parlamentár, aprejentasaun lista ba eleisaun parlamentar nian, iha ne’ebá prevee kada lista kandidatu na’in-tolu (3) iha feto ida.
“Grupu joven parlamentár iha Parlamentu Nasionál iha inisiativa ona atu halo proposta lei ida, bainhira parlamentu diskute ona lei eleisaun parlamentár nia kompozisaun ba lista kandidatura Parlamentu hanoin ona atu halo. Ezemplu, lista kandidatu entre númeru 1 to’o 5, minimu iha reprezentante joven. Ida-ne’e mak ami hanoin atu halo,” nia hatutan.
Ida-ne’e bele fó ona importánsia ba buat ida-ne’ebé real iha lei no lejislasaun sira ba polítika inkluzaun juventude nian iha polítika, lei no lejislasaun sira. Parlamentu Nasionál (PN) hein katak deputadu sira seluk mós bele apoia idea ida-ne’e tanba dezafiu iha polítika mesak todan de’it.
Inan ba nasaun ne’e hateten, PNJ hala’o ho enkuadramentu legál oioin fó mós espasu no oportunidade ba joven sira-nia partisipasaun iha eleisaun lideransa komunitária, ne’ebé involve foinsa’e feto no mane ho kualidade hodi reprezenta foinsa’e sira iha kada konsellu suku.
Antes ne’e Governu mós aprova ona rezolusaun Númeru 23 de 18 Novembru 2010, kona-bá programa Parlamentu Foinsa’e hodi fó espasu aprendizajen ida-ne’ebe independente, demokrátiku no apartidaria (lahó partidu) hodi promove liután foinsa’e sira-nia partisipasaun no sensibilizasaun kona-bá direitu no dever sira nu’udar sidadaun.
Jornalista : Osória Marques
Editór : Cancio Ximenes
