Aviaun Citilink hosi Kuala Lumpur-Dili, to’o iha Aeroportu Comoro, tersa (20/07). Imajen TATOLI/Francisco Sony

DILI, 20 jullu 2021(TATOLI)Aviaun Citilink ho destinasaun Dili bá Kuala Lumpur, sai hosi Aeroportu Internasionál Prezidente Nicolau Lobato, Comoro, maizumenus tuku 15:12, tula pasajeiru hamutuk 142.

“Pasajeiru sira maioria timor-oan ne’ebe maka atu bá serbisu iha rai-li’ur, inklui diplomata sira ne’ebé maka sira-nia misaun hotu ona no sira atu fila bá sira-nia rain,” Diretór Aviaun Citilink iha Timor-Leste, Fernando da Silva, informa iha Aeroportu Comoro, tersa ne’e.

Pasajeiru timor-oan 85 hanesan traballadór atu bá serbisu iha Inglatera, Irlanda, Portugal no Korea.

Notísia relevante: Governu transporta mate-isin traballadór Samuel Soares hosi Korea mai Dili

Enkuantu, pasajeiru hosi Kuala Lumpur mai Dili hamutuk 78, to’o iha Aeroportu Comoro tuku 12:45, ne’ebé entre númeru ne’e inklui delegasaun reprezenta Estadu Timor-Leste ba enkontru altu nível Komunidade País Lian Portugés (CPLP, sigla portugés) iha Luanda no diplomata balun hosi Estadu Unidu Amérika.

Voo hosi Kuala Lumpur mai Dili, tula mós mate-isin tolu, kompostu hosi traballadór timor-oan ne’ebé serbisu iha Korea Súl naran Samuel Sebastião Noronha Soares, labarik mane ho idade 12 hosi Viqueque ne’ebé halo ona tratamentu kuaze tinan-tolu resin iha Pakistão, maibé ikus mai hakotu iis no timor-oan fetoi da hosi Suai, hanesan pasiente hosi Ministériu Saúde ne’ebé halo tratamentu ba iha Jakarta, Indonézia no ikus mai kondisaun grave to’o hakotu iis.

Jornalista : Natalino Costa   

Editora     : Julia Chatarina

HAKEREK NO HATÁN

Please enter your comment!
Please enter your name here