Ministériu Agrikultura no Peska (MAP), liuhosi programa Toos ba Moris Di’ak (TOMAK), entrega manu luhan sanulu (10) no ekipamentu ba uma ka’in-10 iha aldeia Uma Tula Oli, suku Dilór, segunda (19/07/2021). Imajen Tatoli/Vitorino Lopes da Costa.

VIQUEQUE, 19 jullu 2021 (TATOLI)—Ministériu Agrikultura no Peska (MAP), liuhosi programa Toos ba Moris Di’ak (TOMAK), entrega manu luhan sanulu (10) no ekipamentu  ba uma ka’in-10 iha aldeia Uma Tula Oli, suku Dilór, postu administrativu Lacluta, munisípiu Viqueque.

Diretóra Nasionál Veterinária MAP, Joanita Bendita João, hateten Governu liuhosi MAP ho programa TOMAK mak oferese luhan manu nian ba agrikultór-sira, inklui ekipamentu agrikultór nian.

Notísia relevante:UKL iha Lacluta sei konstrui uluk iha suku Dilór

“Distribui manu no manu luhan ba povu agrikultór, ami mós prepara ai-moruk vasina manu nian hodi bele fó vasina ba manu sira ne’e kada fulan tolu. Vasina ne’e atu halo prevensaun ba moras ne’ebé ataka manu Timor,” Joanita Bendita João hateten ba jornalista Agência Tatoli, segunda ne’e.

Joanita argumenta, programa vasina animál ne’e kada tinan mós governu preve orsamentu $200 mill hodi sosa ai moruk vasina animál nian sosa husi nasaun Malaizia maka distribui ba teritóriu Timor-Leste.

Iha fatin hanesan Administradór Munisípiu Viqueque, Januario Soares ‘Bolly’, agradese ba programa TOMAK  ne’ebé fó apoiu ba povu agrikultór hamutuk uma ka’in-10 iha suku Dilór.

Januario Soares ‘Bolly’ konsidera atividade haki’ak manu ne’e di’ak tebes tanba sei fó benefísiu ba uma laran. Tanba ne’e, grupu sira ne’e preisza kuidadu hodi hasa’e númeru manu ne’ebé simu hamutuk sanulu sei bele aumenta barak bainhira benefísiáriu tau atensaun hodi di’ak.

Hornai Soares nu’udár koordenadór ba grupu haki’ak manu deklara sei esforsu hodi dezenvolve no kuidadu  manu sira ne’ebé entrega ona  ba grupu, tanba liuhosi apoiu ida-ne’e bele hadi’a ekonomia família.

Apoiu ne’ebé MAP liuhosi Programa TOMAK mak hanesan, manu luhan unidade 10, manu 20, mákina manuál dulas batar 10, mangeira rolu 10, enxada 10, rede ki’ik manu luhan 10, rede boot manu luhan 10 ba uma ka’in 10.

Kada uma-ka’in  hetan uma manu luhan ida, mangeira rolu ida, mákina ida, rede ki’ik ida no boot ida.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here