Komisaun F hala’o konsultasaun ba projetu lei protesaun labarik no foinsa’e-sira ne’ebé iha perigu, iha salaun Kámara Dioseze Maliana, segunda ne’e. Imajen Tatoli/Sérgio da Cruz.

BOBONARO, 19 jullu 2021 (TATOLI)—Parlamentu Nasionál (PN), liuhosi Komisaun F ne’ebé trata asuntu saúde, seguransa sosiál no igualdade jéneru, halo konsultasaun ba projetu lei protesaun labarik no foinsa’e-sira ne’ebé iha perigu, ho entidade hotu-hotu iha munisípiu Bobonaro.

Konsultasaun públika ne’e hala’o hodi rona direta pareser no rekomendasaun hosi entidade-sira hanesasan, autoridade munisipál, edukasaun, saúde, reliziozu no organizasaun naun governamentál no ajénsia internasionál-sira ne’ebé tau matan ba Direitu labarik iha munisípiu Bobonaro.

Notísia relevante:Komisaun F realiza audiénsia públika kona-ba projetu-lei protesaun labarik-joven iha perigu

Prezidente Komisaun F, Noé da Silva Ximenes Buka-tuir, apresia ho rekomendasaun no parser-sira ne’ebé entidade hotu iha Bobonaro hato’o, nune’e bele hadi’a di’ak liu tan antes tama iha diskusaun espesífika.

“Iha konsultasaun ida-ne’e ami simu sira-nia pareser ne’ebé sei hato’o iha 25 jullu, iha pareser ida-ne’e mak ita sei konsidera sira nia-pensamentu polítika, hodi bele tau hamutuk iha lei ida-ne’e, tanba hakarak halo lei ida presija halo konsultasaun ho entidade tomak,” Noé da Silva Ximenes Buka-tuir hateten ba jornalista-sira iha salaun Kámara Dioseze Maliana, segunda ne’e.

Sekretáriu Autoridade Munisipál Bobonaro, Júlio Caero, hateten presija hadi’a, antes tama iha aprovasaun tanba iha diskusaun balun bele responde situasaun, maibé balun la’e tanba ne’e rekomendasaun hirak-ne’e presija tau iha konsiderasaun.

Nune’e mós Superintendente Edukasaun munisípiu Bobonaro, Fransisco Soares, hateten presija implementa duni lei ne’e, nune’e ema hotu bele banati tuir, nune’e labarik no foinsa’e-sira iha diretu atu hetan protesaun.

Konsultasaun projetu lei númeru  29/V/ ho nia artigu 103 ne’e, lidera hosi Prezidente Komisaun F no akompaña hosi membru komisaun, inklui komisaun G no hetan partisipasaun hosi entidade balun.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here