Diretór Ezekutivu CEPAD, João Boavida. Imajen Tatoli/Egas Cristóvão.

DILI, 18 jullu 2021 (TATOLI)—Parlamentu Nasionál nu’udar órgaun lejizlativu no halo desizaun polítika ba Orsamentu Jerál Estadu (OJE) kada tinan fiskál maibé perspetiva hosi sosiedade sivíl nota katak órgaun ezekutivu la fó resposta ho sériu kona-ba fiskalizasaun polítika ba ezekusaun orsamentu.

Parlamentu Nasionál nu’udar órgaun lejizlativu, fiskalizasaun no halo desizaun Polítika, kompostu hosi mínimu Deputadus na’in 52 no másimu 65 ho mandatu ba tinan lima (5).

Notísia Relevante: Deputadu sira-nia fiskalizasaun  ba munisípiu tenke bazea ba nesesidade

Hosi parte Governu nian mak bele halo mós lei, hanesan dekretu-lei, kona-ba materiál balu, mak sai nu’udar órgaun ezekutivu Estadu nian no órgaun Superiór Administrasaun Públika, responsável mós ba elaborasaun no implementasaun Programa Governu, ne’ebé kontein Polítika Jerál paíz nian, ba tinan Lejizlatura tinan lima (5) nia laran no Primeiru-Ministru mak Xefe Governu.

Ho kompeténsia sira-ne’ebé iha, Agência TATOLI hakarak foka iha efeitu sira hosi fiskalizasaun polítika hosi deputadu sira iha baze, ne’ebé rezultadu vizita fiskalizasaun sempre elobora ho relatóriu. Nune’e públiku bele akompaña perspetiva hosi sosiedade sivíl, deputadu sira no governante sira-nia hanoin kona-ba efeitu hosi fiskalizasaun ne’e rasik.

CEPAD: Fiskalizasaun polítika, PN tenke atualiza fali rezultadu

Diretór Ezekutivu Sentru Estudu ba Pás no Dezenvolvimentu (CEPAD-sigla portugés), João Boavida, konsidera deputadu sira-nia fiskalizasaun ba terrenu hodi halibur hanoin no preokupasaun hosi povu iha terrenu ne’e ne’e importante tebes.

Maibé, nia dehan, ladi’ak mak prodús tiha relatóriu fiskalizasaun no hatutan ba Governu maibé Governu la foti desizaun konkreta hodi resposta ho realidade kona-ba povu nia preokupasaun entaun ne’e bele fó fali impresaun katak deputadu sira tún ba terrenu ne’e hitam di atas putih hodi hetan de’it perdiem maibé rezultadu finál atu konkretiza povu nia moris laiha mudansa.

“Presiza hadi’a mak prosesu fiskalizasaun katak bainhira deputadu sira tún ba terrenu foti povu nia preokupasaun, levanta iha plenária no hatutan ba Governu, labele para de’it iha-ne’e. Tenke atualiza fila-fali preokupasaun ne’e iha terrenu katak Governu responde ona ka seidauk. Ne’e mak ita foin hatene efeitu pozitivu hosi fiskalizasaun polítika ne’e. Se lae, ita bele dehan fiskalizasaun polítika ne’e laiha impaktu,” Diretór CEPAD informa ba Agência TATOLI iha Dili, sábadu ne’e.

Notísia Relevante: PN deside kritéria ba deputadu sira atu halo fiskalizasaun polítika

Ba kestaun ne’e, Diretór Ezekutivu Forum Organizasaun Naun Governamentál Timor-Leste (FONGTIL), Daniel Santos do Carmo, hateten deputadu sira la uza didi’ak kna’ar iha plenária hodi halo diskusaun ba povu nia preokupasaun maibé deputadu sira balun halo de’it auto-defeza ba sira-nia aan de’it.

“Naturalmente ezekusaun orsamentu tama iha implementasaun entaun deputadu sira tenke halo fiskalizasaun. Maibé, ita haree iha komisaun balun mak ba entaun la efetivu. Tanba ne’e mak problema sosiál iha no mosu iha ita-nia rain ema hamlaha,” nia dehan.

Diretór ne’e observa katak, deputadu sira levanta duni povu nia preokupasaun iha plenária parlamentár maibé deputadu sira la fiskaliza fali povu nia preokupasaun katak Governu fó ona resposta ba povu nia preokupasaun ne’e ka lae.

Rekuñese la atualiza

Prátikamente, Prezidente Komisaun F ne’ebé trata Asuntu Saúde, Seguransa Sosiál no Igualdade Jéneru, Deputadu Noé da Silva Ximenes ‘Buka-Tuir’ esplika iha prátika normál buat ne’ebé akontese iha Parlamentu Nasionál mak reprezentante povu sira vizita no halo fiskalizasaun hodi rekolla povu nia aspirasaun iha terrenu.

Notísia Relevante: Komisaun F husu MS fasilita ekipamentu médiku ba profisionál saúde

Hafoin ne’e, ikus mai halo relatóriu ba iha meza Parlamentu Nasionál hodi hetan apresiasaun depois hetan tiha apresiasaun relatoriu refere sei haruka ba ministériu ida-ne’ebé mak deputadu sira identifika tuir problema ne’ebé povu enfrenta iha terrenu.

Ezemplu, nia dehan, iha sentru saude balun ne’ebé maka karik pesoál saude sira laiha fatin hala’o servisu entaun iha fiskalizasaun ne’e tenke deskreve depois tenke klarifika ba ministériu relevante atubele tau atensaun ba situasaun ida-ne’e.

Depuatdo PLP, Noe da Silva Ximenes. Imajen Tatoli/Egas Cristovão.

“Resposta Governu nian bainbain informalmente direta de’it, laliu hosi eskrita katak situasaun ida-ne’e ami rezolve tiha ona, entaun ami kaer mak informasaun verbál mak sira (Governu) fó. Agora, pratikamente ami (Parlamentu Nasionál) tenke tún fila-fali ba terrenu, ida-ne’e laiha,” Prezidente Komisaun F ne’e informa ba Agência TATOLI.

Durante ne’e, nia dehan, difikuldade ne’ebé Komisaun F hasoru mak durante ne’e la konsege haree fila-fali problema ne’e Governu rezolve ona ka seidauk.

Prezidente Komisaun G ne’ebé trata asuntu Edukasaun, Juventude, Kultura no Sidadania, Deputadu António Verdiál de Sousa, informa kazu konkreta mak profesór no inan-aman sira nia   halerik iha territóriu nasionál mak infraestrura eskola, menus profesór, kestaun profesór kontratadu no voluntáriu.

Notísia Relevante: Komisaun G identifika problema barak iha área edukasaun

Nia haklaken, problema ne’ebé Komisaun G identifika iha terrenu, iha área temátika prioridade sira mak hanesan fasilidade eskola inklui kondisaun infraestrutura, bee no saneamentu, kondisaun dapur hodi responde ba merenda eskolár, kadeira, meza ba estudante sira, kondisaun biblioteka, edifísiu ba administrasaun eskolár, rezidénsia ba profesór sira.

Nia habadak de’it katak área ne’ebé importante liu mak infraestrutura, fasilidade no dezafiu sira-ne’ebé manorin na’in sira hasoru durante hala’o prosesu ensinu aprendizajen.

Prezidente Komisaun G PN, António Verdial. Imajen Tatoli/Antonio Gonçalves

“Haree ba realidade problema boot ne’e, iha área edukasaun mak kondisaun eskola barak mak aat ona no fasilidade sira la kompletu, rezidénsia ba profesór sira laiha, seguransa ba eskola laiha, menus rekursu umanu, tratamentu bém estar ba profesór sira ladi’ak no laiha fornesimentu bee-moos ba eskola,” nia informa.

Nune’e mós problema seluk ne’ebé akontese iha eskola sira mak ekipamentu eletrónika ka komputadór no laiha laboratóriu.

Komisaun G mós identifika problema edukasaun ne’ebé durante ne’e iha mak númeru alunu sira iha kada sala lubun ua’in, kurríkulu, karga oráriu ba profesór sira, laiha profesór sira ba iha Ensinu Tékniku Vokasionál.

“Ha’u atu hateten loloos katak ita-nia Governu seidauk fó atendimentu no fó resposta ba fiskalizasaun polítika ne’ebé deputadu sira halo kona-ba povu nia preokupasaun ka problema ne’ebé povuu hasoru iha terrenu,” nia informa.

COVID-19 impede vizita fiskalizasaun

Entretantu, Prezidente Komisaun E ne’ebé trata asuntu Infraestrutura, Deputadu Abel Pires da Silva, informa Konstitusionál RDTL fahe kna’ar Governu mak halo planu orsamentu, parlamentu aprova no tenke fiskaliza iha ezekusaun.

Prezidente Komisaun E Parlamentu Nasionál (PN), Abel Pires. Imajen Tatoli/Egas Cristovão.

“Kona-ba Governu nia resposta ba fiskalizasaun ne’e iha prosesu, ne’e la’ós masin mér kedas, sempre iha tempu tanba Governu mós serbisu barak, Governu mós hasoru problema barak, satán iha situasaun pandemia COVID-19. Infelizmente Governu iha orsamentu natoon atu halo intervensaun ba problema sira-ne’ebé ami rekolla,” nia dehan.

Nia dehan, iha Komisaun E nia fiskalzasaun espesífika ba projetu infraestrutura hanesan estrada, ponte, área telekomunikasaun no infraestrutura sira seluk., Komisaun E identifika finansiamentu investimentu públiku iha infraestrutura tenke inklui manutensaun no reabilitasaun.

Notísia Relevante: Governu Finaliza Ona Kontratu Fiskalizasaun ba Reabilitasaun Estrada Hera-Manatuto

Komisaun E ne’ebé trata asuntu infraestrutura rekomenda ba Ministériu Obra Públika (MOP) tau atensaun ba ponte sira-ne’ebé ligasaun entre munisipál no nasionál ne’ebé sai setór xave ba dezenvolvimentu ekonomia iha Viqueque nian.

Komisaun E identifika iha munisípiu Manufahi katak presiza konsolida liután sistema komunikasaun no koordenasaun iha ámbitu supervizaun no kontrolu ba projetu sira.

Hosi parte Manatuto nian, Komisaun E rekomenda Governu fó importánsia ba planu rekonstrusaun ponte La-Mara iha Natarbora, tanba hetan estragu tinan rua (2)-resin ona nune’e fasilita movimentasaun transporte públiku liu-liu fasilita komunidade sira.

“Importante mak ne’e, Parlamentu Nasionál akompaña no depois fó hanoin ba Governu katak estrada ba infraestrutura ne’e barak tebes, entaun Komisaun E sei rekomenda atubele ba orsamentu 2022 ne’e Governu tenke fó prioridade ba manutensaun ba estrada, ponte, bee-moos no infraestrutura sira seluk,” nia akresenta.

Traballadór hosi empreza Montana Diak kontinua serbisu faze finál rekonstrusaun estrada protokolu iha Embaixada Japaun oin, iha Praia dos Coqueiros, segunda (17/05). Imajen Tatoli/Florêncio Miranda Ximenes

Nia fó ezemplu, estrada foun liga entre suku Tibar ba Gleno kuaze pontu 50-resin mak hetan estragu, barak liután estraga liga entre Manatuto ba Natarbora ne’e kuaze 30% ne’e naksobu entaun manutensaun ne’e todan (presiza despeza boot).

Nune’e mós estrada iha Postu Administrativu Laklubar hetan estragu, ponte naksobu, entaun Komisaun E sujere ba OJE 2022 foka ba manutensaun.

“Ita hakarak halo estrada foun maibé ita laiha hanoin halo manutensaun entaun estragu sei aumenta,” Prezidente Komisaun E ne’e fó hanoin ba Governu.

Notísia Relevante: MOP avalia ona dokumentu konkursu públiku estrada rurál munisípiu hitu

Entretantu Vise-Prezidente Komisaun D ne’ebé trata asuntu Ekonomia no Dezenvolvimentu, Deputada Olinda Guterres, hateten dezde 2020 labele halo fiskalizasaun tanba kestaun COVID-19 no estadu aplika serka sanitária, nune’e iha 2021 foin hahú halo fiskalizasaun.

“Kona-ba fiskalizasaun ne’e Governu sempre resposta. Ami komisaun D nia fiskalizasaun sempre ho relatóriu,” nia dehan.

Fiskalizasaun polítika hosi Komisaun D nian ba Institutu Petróleu no Jeolojia (IPG-sigla portugés) identifika, dezde 2012 to’o agora seidauk iha edifísiu rasik, nune’e kada fulan IPG tenke aluga ho montante orsamentu $10,800.

Nune’e mós IPG seidauk iha laboratóriu rasik no fasilidade laboratóriu ne’ebé mak atu utiliza ba halo teste kona-ba dadus rekursu minerál no petróleu, maibé durante ne’e teste laboratórou sempre haruka ba rai-li’ur ho kustu ne’ebé karun liu.

Komisaun D mós rekomenda ba Governu tenke estabelese regra ba investimentu kapitál umanu, nune’e kesi-metin bainhira bolseiru sira termina estudu fila-fali mai ne’e, sei la sees ka buka servisu seluk iha ba fatin seluk.

Hatán ba preokupasaun ne’e, Ministru ba Asuntu Parlamentár no Komunikasaun Sosiál (MAPKOMS), Francisco Jeronimo esplika preokupasaun ne’ebé deputadu sira levanta relasaun ho vizita fiskalizasaun sempre enkamiña ba ministériu relevante sira.

“Hirak-ne’ebé la responde hatama fali planu asaun anuál hodi prevee orsamentu iha tinan fiskál tuir mai. Preokupasaun balun relasaun ho orsamentu ita la prevee iha tinan fiskál ne’ebé la’o daudaun, entaun Governu tenke iha planu foun, preokupasaun balun ne’ebé la presiza orsamentu, ne’e tenke rezolve kedas,” Governante ne’e fundamenta.

Tuir observasaun Agência TATOLI durante ne’e, hatudu katak Komisaun Espesializada Permanente (KEP) sira iha Parlamentu Nasionál nia atividade fiskalizasaun bazea ba Planu Asaun Anuál (PAA) ne’ebé previstu iha orsamentu privativu parlamentu nian iha Orsamentu Jerál Estadu (OJE) kada tinan.

Parlamentu Nasionál halo vizita fiskalizasaun ne’e haktuir iha Konstituisaun RDTL artigu 92 ne’ebé define katak ‘Parlamentu Nasionál mak órgaun soberania Repúblika Timór-Leste nian ne’ebé reprezenta ema Timor-oan tomak, iha kbiit atu halo lei, atu fiskaliza no atu halo desizaun polítika’.

Notísia Relevante: Prioridade PN 2021 sei prodús lei, halo fiskalizasaun no harii edifísiu foun

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here