Kondisaun estrada liga hosi suku Manapa ba Postu administrativu, Cailaco Villa. Imajen Tatoli/Sérgio da Cruz.

BOBONARO, 18 jullu 2021 (TATOLI)—Estrada difikulta populsaun suku Da-udu, postu administrativu Cailaco, Munisípiu Bobonaro hodi transporta produtu lokál ba merkadu Cailaco Villa.

“Hau nia-suku izoladu liu. Iha tempu bailoron rai rahun, no tempu udan motór de’it mós labele liu, tanba tahu makás. Tanba ne’e, komunidade susar atu lori sira nia-prudutu ba faan iha merkadu,” Xefe suku Da-udu, Anibal Mau-Lelo, hateten ba jornalista Agência Tatoli, iha Moleana, domingu ne’e.

Notísia relevante:Populasaun Aiasa seidauk asesu estrada-eletrisidade

Autoridade lokál ne’e esplika, hosi suku Da-udu ba merkadu Cailaco villa tenke la’o kilómetru sia, tanba ne’e dala barak produtu lokál ne’e estraga hotu.

Iha fatin hanesan komunidade, Alarico Lelo-Soro, hateten suku ne’e maioria moris ho vida agrikultór, halo to’os hodi kuda batar, fehuk, ai-farina, talas, lakeru, kumbili no liis inklui hakiak animal hanesan karau, fahi, bibi no manu.

“Iha-ne’e tinan-tinan produsaun ba produtu lokál sa’e makás, maibé komunidade uza hodi han de’it no labele faan ba fatin seluk, tanba estrada aat,” Alarico Lelo-Soro, hateten.

Suku Da-udu iha aldeia rua mak hanesan, Kauloko-lete no Saeheu ho totál populasaun 804 maihosi xefe família 160.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here