Diretór Ezekutivu CNC, I.P, Hugo Maria Fernandes. Imajen TATOLI/Joanico de Araújo

DILI, 18 jullu 2021 (TATOLI)—Centro Nacionál Chega Institutu Públiku (CNC, I.P), sabadu ne’e halo lansamentu relatóriu anuál 2020 no lansa planu estratéjiku CNC ba 2021-2025 nian iha selebrasaun aniversáriu CNC ba dala-IV ho tema “Memorializasaun Dalan ba Dignifika Sobreviente Sira” ne’ebé realiza iha Antigu Komarka, Balide, Dili.

Notísia Relevante: Primeiru-Ministru felisita aniversáriu CNC ba dala-IV

Diretór Ezekutivu Centro Nacionál Chega, Hugo Maria Fernandes hateten, relatóriu 2020 ne’e informa ba públiku kona-ba servisu no Memória Esperansa CNC nian hodi implementa mandate ne’ebé haktuir iha lei númeru 48/2016, ne’ebé introdús ona liuhosi programa prioridade VIII Governu Konstituisionál ba CNC nomós planu estratéjiku no planu anuál 2022 nian.

“Tuir regra ne’e, 15 jullu ami submete ona relatóriu maibé ami ba iha Gabinete Primeiru-Ministru ne’e iha sistema no aniversáriu ba CNC ne’e mós besik malu entaun ohin foin halo lansamentu ofisiál,” Hugo Maria Fernandes ba Agência Tatoli, luhosi telefónika, domingu ne’e.

Nia dehan, objetivu hosi ámbitu relatóriu ne’e kobre responsabilizasaun no funsaun ezekutivu CNC, relasiona ho implementasaun programa atividade no ezekusaun orsamentu CNC iha tinan 2020 kabe ba Dotasaun Orsamentu Temporária (DOT) hahú hosi janeiru-outubru 2020 no Orsamentu Jerál Estadu novembru-dezembru 2022.

“Iha tinan 2021 totál orsamentu ne’ebé aloka ba CNC hamutuk $1.092.004.25 no tinan 2020 nia rohan, ita ezekuta orsamentu alokadu hamutuk $1.026.366.00,” nia dehan.

Orsamentu refere, CNC uza hodi implementa ona programa sira kona-ba sensibilizasaun no formasaun solidaridade ba sobrevivente, memorializasaun no peskiza istóriku nasionaliza no internasionaliza Chega, hametin kooperasaun no parseria. Nune’e mós orsamentu fefere alokadu hodi asegura programa sira iha área boa Governasaun no jestaun instituisionál.

Dinámika rezultadu servisu CNC, nia dehan, nu’udár institutuisaun públiku ho personalidade jurídika autonomia finanseira, administrativu no patrimóniu hala’o servisu integridade ba promove implementasaun rekomendasaun CAVR nian, mak reativa ho instituisionalizasaun memória no promosaun direitu umanu.

Liuhosi edukasaun formasaun no solidaridade ho sobrevivente mukit liu relasiona ho violasaun direitu umanu, nu’udár mós rekomendasaun komum CAVR no CVA kona-ba konstrusaun ba memória peskiza no aprendizajen.

Nia hatutan, iha tinan 2022 CNC halo jestaun servisu tolu orienta bá objetivu boot tolu ne’ebé hatuur ona iha planu estratéjiku 2018-2022.

“Hosi planu estratéjiku ne’e iha objetivu tolu mak sai sentru ba dame no direitu umanu mak iha kapasidade instituisionál, sustentávél no jere ho di’ak. Prezerva memória pasada, edukasaun kona-ba valór dame direitu umanu no fó solidaridade ba vítima vulneravel, sira prodús tiha ona efetu pozitivu. Objetivu ikus mak públiku no parseria Governu nia koñesementu kona-bá relatóriu CAVR no CVA aumenta rede servisu hodi implementa relatóriu metin liután,” nia hateten.

Aleinde lansa relatóriu anuál CNC 2022, CNC mós halo lansamentu planu estratéjiku 2021 ba 2025, no iha planu ne’e iha programa boot tolu ne’ebé ita tau mak hanesan patrimóniu kulturál, inkluzaun sosiál no boa Governasaun no jestaun instituisionál.

Programa patrimóniu kultura mak CNC tenke ajusta ninia programa sira tuir estrutura programa Governu nian, nia sub programa sira mak ko’alia kona-ba peskiza nomós edukasaun no dezimasaun sira iha rai-laran nomós iha rai-li’ur.

Inkluzaun sosiál, mak ko’alia kona-bá oinsá mak halo programa reparasaun ba sobrevivente sira nomós apoiu ba organizasaun sobrevivente sira nian.

“Relatóriu ne’e, ita foku liu bá iha programa reparasaun ba sobrevivente sira tanba programa reparasaun ne’e daudaun hahú la’o ona hansaen ita halo parseria ho Ministériu Solidaridade Sosiál no Inkluzaun, no Ministériu Justisa, prosesu atu hetan parseria mak Ministériu Administrasaun Estatál ne’ebé harii uma bá kbiit kaek.

Iha lansamentu relatóriu ne’e, hetan partisipasaun hosi Prezidente Parlamentu Nasionál, Embaixadór Indonézia, Xefe Gabinete Primeiru-Ministru, representante Tanente Lere Anan Timur, Prezidente Konsellu Imprensa, no entidade sira seluk inklui sobrevivente sira.

Jornalista : Arminda Fonseca

Editór       : Cancio Ximenes

HAKEREK NO HATÁN

Please enter your comment!
Please enter your name here