Imajen/Facebook: Filipe dos Santos Arranhado.

DILI, 17 jullu 2021 (TATOLI)—Grupu Kulturál Fraternál Timor-Leste (TL) lideradu Filipe dos Santos Arranhado, hakerek no prodús múzika “Parabéns 25 Anos CPLP” hodi reprezenta Timor-Leste aprezenta iha abertura simeira no aniversáriu Comunidade dos Paises da Lingua Portugés (CPLP) ba dala-25 ne’ebé realiza iha Luanda-Angola, 17 jullu 2021.

Kompozitór múzika, Filipe dos Santos Arranhado, hateten grupu artista Lusofonia iha inisitiva halo múzika ne’e tanba CPLP hamriik iha 17 jullu 1996 ho objetivu kooperasaun ho amigu país CPLP sira iha tinan 1996 harii iha Angola no Timor-Leste (TL) hafoin restaura ninia indepedénsia iha 2002, TL sai hanesan país foun ida tama ba CPLP mak foin tuir Guiné Equatorial.

Filipe dos Santos Arranhado. Imajen Tatoli/Arminda Fonseca.

“Múzika ne’ebé ami halo aprezenta iha abertura simeira CPLP ne’e, ha’u hasai ninia konteudu hosi akordu ne’ebé altura sira kria CPLP iha Lisboa. Entaun, iha múzika ne’e ninia konteudu país CPLP atu bele hamutuk konsolidasaun iha futuru iha área edukasaun, defeza, agrikultura, ekonómia no seluk tan ne’ebé akordu CPLP harii. Múzikia ne’ebé ita halo ne’e nia titulu “Parabéns 25 Anos CPLP” no parabens ba lusofonia katak parabens ba país sira-ne’ebé ko’alia lian portugés,” Filipe dos Santos Arranhado, hateten ba Agência Tatoli iha nia rezidénsia, Aimutin, Dili, sábadu ne’e.

Objetivu halo múzika ne’e hanesan solidaridade ba país amigu CPLP ne’ebé iha iha situasaun difisil relasiona problema polítika TL nian liubá, portugeza sira mak halo esforsu makaas hodi apoiu ba rezolusaun iha Nasaun Unida atu Timor-Leste bele hetan indepedénsia nasionál.

Nia hatutan, tanba hatene katak CPLP halo aniversáriu bad ala-25 ne’e iha loron 17 jullu mak mak antes fulan ida liubá nia hanoin hakerek no prodús múzika refere.

Maske iha situasaun COVID-19 ne’ebé grupu ne’e labele partisipa iha semeira CPLP maibé nia garante katak múzika ne’e sei toka iha semeira refere tanba antes semana ida delegasaun TL aranka ba Luanda, nia rasik propoin liuhosi Ministériu Administrasaun Estatál (MAE) hato’o ba Ministériu Negósiu Estranjeiru no Kooperasaun (MNEK), sira konkorda mak nia halo kedas gravasaun no prodús video sia (9) ho rekordasaun ida tinan 25 CPLP nian.

“Rekordasaun ne’e pintura ida hosi pintór timor-oan ida ne’’ebé pinta bandeira RDTL sia no tau tinan 25 CPLP. Ida-ne’e konforme iha reuniaun delegasaun TL ba CPLP katak, ida-ne’e Ministru José Reis mak sei entega ba Portugál mak entrega ba Angola hanesan uma-nain ba konferénsia semeira CPLP nian iha Luanda,” nia dehan.

Iha múzika “Parabéns 25 Anos CPLP” ninia video klip ne’e, sira husu ajuda hosi sira-nia Grupu Kulturál Faternal mak prodús video ne’e hodi espresa Timor-Leste nia solidaridade ba país CPLP.

“Múzika ne’e ha’u rasik hanesan kompozitór. Múzika ne’e, artista na’in-tolu (3), ha’u-nia oan rasik Carla Arranhado, artista senior ida, Ofi Castelho no Fiorelas Beremota, sira na’in-tolu mak kanta no halo video ida-ne’e,” nia haktuir.

Imajen/Facebook: Filipe dos Santos Arranhado.

Liuhosi múzika “Parabéns 25 Anos CPLP” nia hato’o mensajen no husu kooperasaun país CPLP sira atu haree kontestu TL rekonstrusaun nasionál setór hotu-hotu la’o maibé ba setór arte kultura nasionál mak seidauk la’o, entaun nia husu ba Governu TL no páis CPLP sira atu halo kooperasaun internsionál ida bele tama rekonstrusaun nasionál TL nian iha arte kultura ninian.

Kompozitór múzika ne’e haktuir, ninia vida artista nian hahú otas sei labarik bainhira nia hala’o estudu iha Misaun Salesiano iha Dili iha tinan 1958.

“Tanba momentu ha’u sei kiik, hahú aprende ona huu gaeta, kaer ona bandolin hodi aprende, Tempu ba joven nian, ha’u ho artista Chico Maulohi (matebian), artista dahuluk mak ami na’in rua. Ami hahú kanta ne’e iha tinan 1960 sira ne’e,” nia dehan.

Durante iha tempu okupasaun Indonézia, múziku ne’e hakerek múzika hodi kontra makaas okupasaun Indonézia mak ho titulu “Avansa, Avansa”. Iha biban ne’ebá, nia prodús album múzika hamutuk sia (9) hanesan Sa’e Foho Tun Foho, Inalou, Loli Dali, Marsa Fraternál, Timor Nia Mehi, Timor 1950 no seluk tán.

“Hosi album múzika sia (9) ne’e, ida-ne’ebé ha’u sente konfortável mak “Rai Timor Lorosa’e” ne’ebé uluk artista Gina Correia mak kanta. Múzika ne’e artista timor-oan sira mós iha ona planu katak aban bainrua ha’u mate karik múzika Rai Timor Lorosa’e mak sei akompaña ha’u tama to’o rai kuak,” nia dehan.

Jornalista : Arminda Fonseca

Editór       : Cancio Ximenes

HAKEREK NO HATÁN

Please enter your comment!
Please enter your name here