Serimónia rituál hosi tara bandu. Foto mídia MSS

DILI, 17 jullu 2021 (TATOLI)—Administradór no Prezidente Konsellu Konsultivu Munisipál Munisípiu Manufahi, kinta (15/07) ne’e realiza enkontru ho xefe suku, lia-na’in, líder partidu polítiku, reprezentante relijioza, veteranu, Adminitradór Postu, nomós Diretór Servisu Munisipál halo apresiasaunba bá regulamentu tara bandu ne’ebé sei aplika iha Munisípiu Manufahi.

Notísia Relevante: Komunidade Turiskai Realiza Tara Bandu Hodi Hametin Unidade

Administradór Munisípiu Manufahi, Arantes Isaac Sarmento informa, enkontru ne’e hala’o bazea ba dekretu-lei Númeru 3/2016 nomós lei diploma ministeriál Númeru 31/2016, 30 setembru, hodi halo apresiasaun ba regulamentu tara bandu nian iha nivél munisípiu.

Administradór Munisípiu Manufahi, Arantes Isaac Sarmento. Imajen Tatoli/Dok

“Iha enkontru ne’e, partisipante sira halo observasaun no sei halo apresiasaun hosi Konsellu Konsultivu ba regulamentu tara bandu ne’e, sei hetan fali aprovasaun hosi Konsellu Koordenasaun Munisipál bazea ba dekretu-lei nomós lei diploma ministerial ne’e,” Arantes Isaac Sarmento hateten ba Agência Tatoli, liuhosi telefónika, sábadu ne’e.  

Bainhira hetan ona apresiasaun hosi Konsellu tara bandu nivel Munisípiu mak fila-fali ba iha komisaun permanente tara bandu ho ninia estrutura, sei hala’o sensibilizasaun hodi implementa programa tara bandu ne’e iha nivel munisípiu, liu-liu Same no Fatuberliu.

Nia afirma, regra sira-ne’ebé iha regulamentu tara bandu ne’e hanesan relasaun ema ho natureza, ema ho animál no ema ho ema, no hosi regulamentu ne’e bainhira kontra sei hetan sansaun ka multa.

Regulamentu entre relasaun ema ho natureza mak bandu ema labele ta’a ai, sunu-rai arbiru iha fatin ne’ebé la’os to’os, labele ta’a ai tama ema-nia toos sein lisensa hosi toos na’in, no labele estraga sasán públiku hanesan sede Suku, Klínika, eskola no seluk tán.

Bainhira viola regulamentu hirak ne’e sei hetan sansaun hanesan tesi ai-hun ida multa $50 no kuda fali ai-hun sanulu, no tama ema-nia kintál mak estraga ai-horis mak multa $500, estraga fatin sagradu ruma multa $1.000, soe lixu arbiru iha sidade, lixu kiik hanesan plastiku rebusadu kulit no seluk tan $1,50, lixu boot hanesan ta’a ai soe arbiru, kaixa mamuk hosi loja sira no seluk tan multa $100.

Regulamentu entre relasaun ema ho animál mak bandu ema labele oho animál fuik sira, labele haki’ak ka husik animál la’o livre iha fatin públiku sira, labele husik animál ba estraga ema-nia to’os.

Bainhira viola maka ema sira-ne’e sei hetan sansaun mak hanesan bainhira oho animál fuik multa $500 to’o $1.000, na’ok animál ba malu multa $50 to’o 200, no husik animál iha fatin públiku sei oho hosi servisu agua saneamentu.

Entretantu regulamentu entre relasaun ema ho ema mak bandu ema labele halo relasaun seksuál hasoru menoridade, bandu feto ka mane kama rua (selingkuh), no bandu aman ka inan labele hola fali oan, bandu grupu arte marsiál oho malu, no violénsia fíziku.

Hirak ne’ebé viola regra ne’e, sei hetan sansaun mak halo relasaun seksuál hasoru menoridade sei prosesu tuir lei ne’ebé iha no problema kona-ba selingkuh prosesu tuir lei kultura katak feto boot iha direitu ba rai uma no animál.

“Osan sira-ne’ebé rekolla hosi ema viola regra tara bandu ne’e, sei hatama ba iha suku, nune’e hodi kontribui ba dezenvolvimentu suku nian,” nia dehan.

Programa tara bandu ne’ebé mak administrasaun munisípiu inísia hamutuk ho parseiru lokál sira hanesan Organizasaun Naun Governamentál Luta ba Futuru, Luta ba Mudansa, Governu liu-liu Sekretáriu Estadu Ambiente trasa hela regularmentu tara bandu ne’ebé sei aplika iha tara bandu.

Jornalista : Arminda Fonseca

Editór      : Cancio Ximenes