To’os-na’in, Agustino Lelo, kuda hela repollu iha natar Ramaskora, Maliana, sesta (16/07/21). Imajen Tatoli/Sérgio da Cruz.

BOBONARO, 16 jullu 2021 (TATOLI)—To’os-na’in iha área Ramaskora suku Odomau, postu administrativu Maliana, Munisipiu Bobonaro, kada tinan prodús ropollu ho kuntidade boot, maibé tinan ida ne’e ladún folin tanba situasaun COVID-19.

To’os-na’in, Angelica Maia, preokupa tanba durante ne’e sempre transporta repollu ba Dili utiliza transporte públiku, no repollu folin  ladún di’ak tanba kompradór-sira iha Dili mós menus.

Notísia relevante:2021, suku tolu iha Bobonaro sei asesu eletrisidade

“Repollu bele folin bainhira ami nia kliente sira hosi Dili mak mai sosa direta iha ne’e. Durante Estadu emerjénsia ami nia modo dodok hotu tanba laiha ema mak mai hola,” Angelica Maia, hateten ba jornalista Agência Tatoli, sesta ne’e.

Nia konta tuir katak, tinan sira antes kada kantaderu sempre faan ba klinete sira ho folin $300, no agrikultór-sira mós ezjize ba Governu  atu harii sentru ka loja agrikultura iha Maliana, nune’e iha situasaun difísil bele fasilita agrikultór-sira.

Alende kuda repollu, to’os-na’in sira mós kuda modo mutin, kanku, brinjela, alfase, tomate, maibé maioria faan de’it iha merkadu Maliana.

Nune’e mós to’os-na’in, Agustino Lelo, esplika katak repollu ne’e sira kuda de’it iha natar tanba hare kolleta ona iha fulan marsu.

“Tinan ida ita uza udan been hodi kuda hare, bainhira kolleta ona ita kuda fali modo hanesan repollu,” Agustino Lelo, hateten ba jornalista Agência Tatoli, iha to’os Ramaskora.

Tuir observasaun, oras-ne’e daudaun irrigasaun Maliana bee menus ona, tanba ne’e to’os-na’in sira aproveita hodi kuda de’it modo iha suku tolu mak hanesan, Odomau, Raifun no Ritabou uza ekipmentu tradisionál hanesan ensada, ai-suak no seluk tan.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here