Prezidente Autoridade RAEOA Arsenio Paixao Bano entrega apoia ba vitima dezastre siklone tropikal seroja iha RAEOA. Imajen/Abilio Elo Nini.

OÉ-CUSSE, 16 jullu 2021 (TATOLI)-Autoridade Rejiaun Administrativa Espesiál Oé-Cusse Ambeno (RAEOA) daudaun ne’e, utiliza ona orsamentu jerál Estadu 2021 hamutuk millaun $ 2-resin hodi responde ba vitima  sira ne’ebé maka afetadu husi dezastre naturál siklone tropikál seroja.

Dezastre naturál ne’e, akontese iha loron 4 fulan-abríl 2021 hodi estraga agrikultór sira ninia produsaun RAEOA, husi toos rai-maran esktare 315,82 husi totál uma-kain 537, natar ektare 105,62 husi uma-kain 365.

Prezidente RAEOA, Arsénio Paixão Bano, hateten tipu husi apoia rekuperasaun ne’e kompostu husi foos uma-kain 904, durante fulan haat tanba falla kolleta.

Kioske 26, uma aat totál 63, no mós konkursu públiku ba projetu “beronjong”hamutuk 20 hodi proteje zona produtivu iha área Noel-Ekat sub-rejiaun Oésilo, mota Tono Ponte Noefefan sub-rejiaun Pante Makasar to’o Citrana sub-rejiaun Nitibe.

“RAEOA gasta kuaze millaun $ 2-resin, millaun $1-resin gasta ba área agríkultura nian de’it ba rekuperasaun, manutensaun, no ba protesaun ba área protejida ninian, i depois ba gabiaun ka (beronjong) jerál protesaun no uma, ida ne’e gasta besik millaun $2-resin,”dehan, Arsénio bainhira lansa programa distribuisaun aihan ba vitima hamutuk 904 iha Aen-Mat suku Cunha sub-rejiaun Pante Makasar, kinta ne’e.

Benefisiáriu 904 ne’ebé simu ona apoia foos hamutuk saka 3.616 durante fulan haat, hahú jullu to’o outobru, kada fulan família uma-kain hetan saka ida.

Aleinde ne’e, sei fó apoia fini, no  fila-rai gratuita ba agrikultór sira tanba programa ne’e tama ona iha pakote apoia rekuperasaun.

Iha tempu badak sei fó mós apoia ba vitima hamutuk uma-kain 63 ne’ebé maka sira-nia uma hetan estragus, apoia negosiante 26 ne’ebé sira-nia kioske hetan estragus iha merkadu Maumate, suku Naimeco sub-rejiaun Pante Makasar no fatin seluk tan.

Nune’e mós iha semana oin sei públika kompañia ne’ebé manán projetu kontrusaun beronjong hamutuk 20.

“Desde tinan kotuk Oé-Cusse iha rekuperasaun ekonomia 2, ida hosi nasionál  maka subsídiu COVID-19 kada uma-kain hetan $200, no tama fali rekuperasaun ida maka sesta bázika maibé ita seidauk halo rekuperasaun ekonomia iha inundasaun siklone tropikál seroja entaun agora mak ita responde ona,” Prezidente RAEOA esplika.

Iha fatin hanesan Sekretariu Rejionál Asuntu Agríkultura, José Eta, informa nia parte rejistu ona agrikultór sira ne’ebé maka sira-ninia produtu hetan estragus totál, no falla kolleta.

“Klasifikasaun 3 ne’e iha RAEOA iha suku 15 mak hetan afeitasaun falla kolleta ho totál uma kain 904 maioria hosi sub-rejiaun Pante Makasar, la inklui suku Ban-Afi, Malelat, no Suni-Ufe, tanba dadús ne’e foti iha inisiu akontesimentu inundasaun foin akontese,” nia relata.

Entretantu, xefe suku Naimeco, sub-rejiaun Pante Makasar, Marcos Liu Abi,agradese ba apoia ne’ebé distribui ona husi Autoridade RAEOA.

“Iha ha’u nia suku hetan estragus ba toos no natar ektare 78 ne’e balu falla totál la kolleta,” nia hateten.

Jornalista:Abílio Elo Nini

Editór :Agapito dos Santos

HAKEREK NO HATÁN

Please enter your comment!
Please enter your name here