Osan Dollar Amerikanu. Imajen/Espesiál

DILI, 16 jullu 2021 (TATOLI)—Ministru Finansa (MF), Rui Augusto Gomes, konsidera orsamentu bazeia ba programa ne’ebé Governu hahú implementa iha Orsamentu Jerál Estadu (OJE) 2021 ho forma kompletu, nu’udar tranzisaun ida hosi orsamentu pur item ne’ebé mak implementa desde Timor-Leste restaura ninia independénsia tinan 19 liubá.

“Polítika ne’e nia objetivu mak atu asegura serbisu públiku ida-ne’ebé prudente ho rasiosinu sosiu-ekonómiku atu asegura rezultadu reál hosi ezekusaun, la’ós persentajen ezekusaun de’it,” Ministru esplika liuhosi nota imprensa ne’ebé Agência TATOLI asesu, sesta ne’e.

Notísia relevante: Governu fó prioridade programa neen iha OJE 2022

Elementu importante ida hosi OJE 2021 mak oinsá Timor-Leste rekupera filafali ninia ekonomia ne’ebé iha tinan haat nia laran enfrenta resesaun ekonómika, maibé rekuperasaun ne’e seidauk akontese tuir planu tanba Timor-Leste hahú tinan 2021 enfrenta situsaun pandemia no kalamidade públiku tanba dezastre naturál ne’ebé akontese iha abríl liubá.

“Fiar katak iha tinan oin sei laiha tan surpreza negativu seluk, atu nune’e ita bele hahú rekupera ho transformasaun setór ekonómiku produtivu sira hanesan agrikultura, turizmu, abitasaun, kapitál sosiál ne’ebé kompostu hosi edukasaun, saúde, protesaun Sosiál, no reforma institusionál.

Nune’e, liuhosi investimentu iha setór produtivu hirak ne’e, bele kria empregu dignu hodi fó benefísiu ba família no komunidade sira.

Antes ne’e, iha loron 23 juñu 2021, Konsellu Ministru aprova projetu kona-ba deliberasaun kritériu rasionalizasaun estrutura programátiku OJE 2022, ne’ebé Governu halo ona alterasaun balun iha rasionalizasaun estrutura programátiku atu hasa’e efisiénsia no efikásia ezekusaun orsamentál, inklui hadi’a kapasidade monitorizasaun no kontrolu ba implementasaun programa ho atividade sira ne’ebé mak Governu propoin.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here