Entidade relevante sira akompaña seremónia lansamentu, iha Hotel Timor, sesta (16/07). Imajen/MPM

DILI, 16 jullu 2021 (TATOLI)--Ministériu Petróleu no Minerál (MPM) lansa relatóriu anuál 2020, buletin no website www.mpm.gov.tl hodi fasilita públiku tomak asesu informasaun kona-ba dezenvolvimentu setór petróleu no minerál iha Timor-Leste.

“Lansamentu ne’e hanesan marka polítiku responde ba boa governasaun no transparánsia hodi populasaun Timor-Leste no mundu asesu informasaun kona-ba dezenvolvimentu setór petróleu no minerál,” Ministru Petróleu no Minerál, Víctor da Conceição Soares, hateten, liuhosi diskursu iha Hotel Timor, sesta ne’e.

Governante ne’e konsidera, meiu komunikasaun hirak ne’e bele hakbesik MPM ho instituisaun tutela sira hanesan Autoridade Nasionál Petróleu no Minerál (ANPM), Timor Gás no Petróleu, Empreza Estatál (Timor GAP, E.P) no Institutu Petróleu no Jeolójia (IPG, sigla portugés), inklui ba públiku hotu hodi akompaña.

Ministru konsidera, lansamentu ne’e nu’udar prioridade VIII Governu atu fó informasaun loloos, kredível no transparánsia ba públiku.

“Ita hatene mundu globalizasaun ho teknolójia ne’e hakarak públiku asesu hotu informasaun ho loloos no kredível, atu ema labele halo kleuk informasaun sira kona-ba dezenvolvimentu setór petróleu no minerál inklui gás,” nia akresenta.

Bainhira populasaun akompaña informasaun ho di’ak, loloos no kredível mak bele partisipa no kontribui ba dezenvolvimentu setór petróleu no minerál.

“Nune’e bele hametin kontrolu sosiál hodi partisipa no kontribui ba prosesu dezenvolvimentu setór petrolífera no sai na’in ba rekursu hirak ne’e,” nia hatutan.

Nune’e, MPM agradese ba tékniku sira ne’ebé esforsu hamutuk ho Ajénsia Teknolojia Informasaun no komunikasaun, Insitutisaun Públiku  (TIC Timor, I.P, sigla portugés) hodi konsenge kria portál ministériu nian.

Iha biban hanesan, Ministru Asuntu Parlamentár no Komunikasaun Sosiál (MAPKOMS), Francisco Jerónimo, konsidera inisiativa ne’e nu’udar polítika Governu ba programa boa governasaun no transparánsia liuhosi diseminasaun informasaun.

“Importante tebes atu disemina informasaun atu públiku akompaña saida mak  ita halo ona liuhosi povu nia osan,” nia afirma.

Nune’e, governante ne’e felisita MPM no ekipa tomak tanba bele kria meiu komunikasaun.

“Ha’u fó parabéns tanba fasilita ita-nia povu bele hatene servisu no atividade sira ne’ebé ita halo hodi kontribui ba prosesu dezenvolvimentu iha Timor-Leste,” nia subliña.

Bulletin ne’e halo publikasaun fulan-neen dala-ida, ho atividade sira ne’ebé MPM halo, enkuantu portál sei halo publikasaun loron-loron ho lian tolu hanensa tetun, portugés no inglés.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here