Semináriu kona-bá, implementasaun liberdade kondisionál ba Timoroan iha estrenjéiru no kondenadu iha rai laran, iha salaun Sentru Formasaun Juridika, Caicoli, sesta (16/07). Imajen Tatoli/Francisco Sony.

DILI, 16 jullu 2021 (TATOLI)—Ministériu Justisa (MJ) serbisu hamutuk ho Ministériu Negósiu Estranjeiru no Kooperasaun (MNEK) ho  Embaixada Indonézia iha Dili (KBRI sígla indonézia), realiza semináriu ho tema  ‘Liberdade kondisionál ba ema kondenadu sidadaun timorense iha estranjeiru no  kondenadu sidadaun estranjeiru iha rai laran’.

Vise-Ministru Justisa, José Edmundo Caetano, esplika objetivu hosi semináriu ne’e atu kria liña koordenasaun ba kooperasaun ho entidade relevante no nasaun seluk, hodi promove direitu liberdade kondisionál ba kondenadu estranjeiru iha rai-laran no timoroan kondenadu  ne’ebé iha diaspora.

Notísia relevante:Prizioneiru 539 iha prizaun Becora simu vasina doze dahuluk

“Programa ne’e hola parte iha MJ nian atu fó koñesimentu ba malu, nune’e bele halo kooperasaun atu  promove asesu justisa ba direitu kondenadu ne’ebé hetan liberdade kondisionál,’’ José Edmundo Caetano, hateten ba jornalista-sira iha Sentru Formasaun Jurídika no Judisiáriu, Caicoli, sesta ne’e.

Planu MJ, sei  estabelese kooperasaun judisiáriu internasionál penál ho nasaun seluk hanesan Indonézia, Filipina no sira seluk ne’ebé timoroan barak iha no nasaun-sira mós ninia sidadaun barak iha Timor-Leste (TL).

Liberdade kondisionál ba kondenadu estranjeiru sei haree ba aspeitu kooperasaun Estadu TL ho entidade judisiária internasionál-sira, ne’ebé hatur iha ámbitu tratadu-sira ne’ebé vinkula Estadu TL haktuir iha artigu 22,23 no 25 númeru 1  hosi lei númeru 15/2011, 26 outubru.

Rekezitu liberdade kondisionál ba ema-dadur kondenadu ho konsentimentu, bainhira haktuir metade kumprimentu pena-prizaun nu’udár haktuir iha artigu 119 númeru 1, 120,121,122,123,124 no 125 hosi dekretu lei númeru 14/2014 14 maiu, kona-bá rejime ezekusaun penal.

Kuadru jurídiku nasionál medida liberdade kondisionál ba sidadaun estranjeiru iha TL sei proteze tuir rejime ezekusaun penál  ba aplikasaun kooperasaun judisiáriu penal, sei aproxima padraun internasionál aplikavél sira nu’udár polítika protesaun ba direitu umanu.

Alende ne’e, tuir prosesu atu hetan liberdade kondisionál primeiru Tribunál motifika uluk ba diretór  prizionál ho diretór reinsersaun sosiál ho kondenadu durante loron 90, atu bele submete dokumentu-sira no sei hato’o fila-fali ba Ministériu Públiku (MP), hodi fó pareser liga ho relatóriu ne’ebé iha, bainhira iha posibilidade Tribunál halo audisaun deside.

Kriteria ba prizioneiru kondenadu atu hetan liberdade kondisionál maka, tenke kumpre ona metade pena, no iha avaliasaun másimu bom maihosi relatóriu avaliasaun diretór prizionál reinsersaun sosiál, deklarasaun konsientimentu hosi kondendu rasik.

Nune’e mós Diretór Nasionál Polísia Sientífika Investigasaun Kriminál (PCIC), Vicente Fernandes Brito, nu’udár  oradór iha semináriu ne’e, konsidera akordu  kooperasaun judisiáriu internasionál penál inportante tebes.

Nia fó exemplu katak, bainhira kondenadu sidadaun estranjeiru ida hanesan Indon’eziu  iha TL hetan tiha liberdade kondisionál hakarak husu atu entrega ba fila-fali ba Indonézia liga ba matéria-sira, presiza iha diskusaun ka akordu.

Iha fatin  hanesan, Vise Ministru Negósiu Estranjeiru no  Kooperasaun, Julião da Silva, apresia ho inisiativa MJ  nian, maibé husu atividade hanesan atu konvida mós nasaun-sira hanesan Xina, Koreia, Austrália no Inglaterra tanba timoroan barak iha nasaun  hirak-ne’e, oinsa bele promove kooperasaun bilaterál no multilaterál.

Tuir dadus hosi MJ, daudaun ne’e iha kondenadu sidadaun estranjeiru na’in 12 mak kumpre hela prizaun iha TL.

Alende nee, tuir hosi dadus Tribunál Distritál Dili (TDD), hosi janeiru to’o juñu tinan ne’e, fó liberdade kondisionál ba prizoneiru kondenadu hamutuk na’in 29, ne’ebé antes ne’e komete kazu hanesan omísidiu, violasaun seksuál, korrupsaun ho sira-seluk, maihosi estabelesimentu prizaun Becora no Gleno.

Partisipa iha semináriu ne’e mai hosi reprezentante KBRI iha Dili, diretór prizionál ho konvidadu-sira seluk.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here