Ministra Saúde (MS), Odete Maria Freitas Belo, hala’o vizita ba postu administrativu Lucluta, Munisíspiu Viqueque, sesta (16/07/21). Imajen Tatoli/Vitorino Lopes da Costa.

VIQUEQUE, 16 jullu 2021 (TATOLI)—Ministra Saúde (MS), Odete Maria Freitas Belo, husu populasaun iha postu administrativu Lucluta, Munisíspiu Viqueque atu ho konsiénsia simu vasina, hodi hasa’e imunidade ba prevensaun COVID-19.

“Prevensaun COVID-19, ida mak vasina atu hasa’e ita-nia imunidade. Husu imi hotu-hotu simu vasina liuliu maluk-sira ho idade avansadu,” Odete Maria Freitas Belo, hateten iha sentru saúde Lacluta, sesta ne’e.

Notísia relevante:Kobertura saúde iha Viqueque la’o di’ak

Governante ne’e husu mós ba populasuan tenke uza máskara, molok han tenke fase liman no tenke uza beibeik dezinfektante ruma tanba vírus ne’e dala ruma hatudu isin manas no dala ruma la hatudu isin manas.

Iha fatin hanesan, Diretór Serbisu Saúde Munisípiu Viqueque, Francisco de Carvalho, hateten dadus hosi vasina provizóriu iha munisípiu Viqueque, hosi postu administrativu lima, ema idade 60 ne’ebé simu ona vasina hamutuk na’in 697.

Alende ne’e, funsionáriu iha na’in 698, liña frente na’in 2730, idade hosi 18-59 hamutuk na’in 955, ema ho komorbilidade no idade 18-59 na’in 8.948 la’ós komorbilidade no idade 60 hamutuk na’in 2.697 ho totál na’in 16.030 kompustu hosi feto na’in 7.231 no mane na’in 8.799.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here