Produtu Cesta Bázika. Imajen TATOLI/Antónia Gusmão.

DILI, 16 jullu 2021 (TATOLI)—Kompañia fornesidór Cesta Bázika rua ne’ebé halo kontratu ho Sekretaria Estadu Kooperativa (SEKoop) atu sosa no distribui produtu, hetan sansaun administrativa.

“Iha kompañia rua ne’ebé halo kontratu ho SEKoop viola regra no Komisaun Antí Korrupsaun (CAC, sigla portugés) mak kaer toman no sira selu ona multa,” Koordenadór distribuisaun Cesta Bázika SEKoop, Tomas Ximenes, informa ba Agência TATOLI, iha ninia knaar fatin, Acait, sesta ne’e.

Tuir responsável atividade ne’e, kompañia rua ne’e ida hosi Liquiçá no ida hosi Lautém.

“Kompañia hosi Liquiçá dehan fahe foos-rai, maibé kuadu SEKoop no ekipa hosi CAC tun hodi observa, sira fahe foos ho marka Folsom, tanba ne’e ami deside fó multa ba sira inklui kompañia seluk ne’ebé ho kazu hanesan,” nia akresenta.

Maski mosu problema, maibé tuir Koordenadór atividade la’o di’ak tebes no SEKoop bele finaliza distribuisaun iha munisípiu hitu hanesan Covalima, Liquiçá, Lautém, Ainaro, Aileu, Manufahi  no Manatuto, iha suku 183, postu administrativu 33.

“Ha’u hanoin buat hotu la’o di’ak, folin $25 produtu ba fulan rua, tuir dekretu-lei Governu,” nia hatutan.

SEKoop halo ona pagamentu ba kompañia 14 iha faze dahuluk no hela kompañia 13 maka seidauk.

“Kompañia fornesedór Cesta Bázika hosi SEKoop hamutuk 27, ninia pagamentu kuaze finaliza ona, horiseik submete ona pedidu pagamentu 13,” nia dehan.

Programa Cesta Bázika fixa membru idaidak agregadu familiár sei hetan $25, kada fulan iha fulan-rua nia laran ($50 kada ema) ne’ebé troka ho folin sasán ne’ebé korresponde ba valór osan.

Bazeia ba dekretu-lei númeru 48/2020, 07 outubru, kona-ba medida apoiu família, atribuisaun Cesta Bázika, operadór ekonómika lokál iha ámbitu planu rekuperasaun ekonómika no kria rejime espesiál aprovizionamentu ba efeitu, iha artigu 10 kona-ba modalidade aprovizionamentu, hatuur katak aprovizionametu ba akizisaun produtu Cesta Bázika realiza bazeia ba modalidade ajudikasaun direta to’o limite verba ne’ebé aloka ba entidade ajudikante ne’ebé ministériu indika ona.

Governu fó konfiansa ba setór privadu atu asume resposabilidade no garante katak sasán ba benefisiáriu korrespondente ho montante ka osan ne’ebé temi.

Bazeia ba artigu 9 dekretu-lei ne’e, kona-ba akizisaun produtu no embalajen produtu bazeia ba distribuisaun Cesta Bázika obdese ba rejime jurídiku aprovizionamentu no kontratu públiku, independente, ho valór ne’ebé korrespondente.

Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu husi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina-nuu, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.

Enkuantu ba produtu ijiene maka, sabaun, álkool jel, deterjente, eskova nehan no pasta nehan.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here