Diretór Nasionál PSIK, Vicente Fernandes e Brito. Imajen Tatoli/Egas Cristovão

DILI, 16 jullu 2021 (TATOLI)—Hahú janeiru to’o jullu tinan ne’e, Polísia Sientífika Investigasaun Kriminál (PSIK), simu delegasaun kompeténsia hosi Ministériu Públiku (MP), hodi halo invetigasaun ba kazu 50.

Diretór Nasionál PSIK, Vicente Fernandes Brito, hateten prosesu krime hirak-ne’e  tama iha delegasaun PSIK nia-kompeténsia ho natureza kompleksu ka grave, hanesan omesídiu, violénsia seksuál, falsifikasaun dokumentu, burla agravadu no seluk tan.

Notísia relevante:EE, PSIK Aprezenta Kazu 12 ba Ministériu Públiku

“Hosi kazu 50 ne’e ita konklui ona investigasaun 20 no hato’o ona ba MP hodi loke prosesu tuir-mai,” Vicente Fernandes Brito, hateten ba jornalista-sira iha Sentru Formasaun Jurídika no Judisiáriu, Caicoli, sesta ne’e.

Faze investigasaun ba kada prosesu ho prazu másimu loron 90, maibé  prosesu seluk ne’ebé finaliza husu prolonga tan prazu, hodi rekolla liu-tán  indísiu prova atu halo investigasaun komplementár faze inkéritu.

PSIK mós hala’o serbisu, hodi ezekuta mandadu detensaun, kumprimentu pena, mandadu detensaun  primeiru interrogatóriu judisiál, mandadu notifikasaun ba julgamentu iha investigadór PSIK dezloka to’o ba iha munisípiu-sira.

PSIK iha rekursu umanu sufisiente  ho investigadór na’in 75 no espesialista na’in 30, inklui ekipamentu natón hanesan laboratóriu hodi hala’o serbisu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here