Prezidente Institutu Nasionál Seguransa Sosiál (INSS), Longuinhos Armando Leite. Imajen Tatoli/Francisco Sony

DILI, 16 jullu 2021 (TATOLI)—Prezidente Institutu Nasionál Seguransa Sosiál (INSS), Longuinhos Armando Leite, informa INSS hamutuk ho Banku Nasionál Timor-Leste (BNCTL) halo ona pagamentu faze daruak ba entidade empregadór no fakultativu ne’ebé sai benefisiáriu ba programa “Apoiu ba Empregu” hamutuk 3.992

Notísia Relevante: Governu hahú halo pagamentu ba empregadór 5.371

“Entidade fakultativu ne’ebé mak ita selu ne’e 1.364, traballadór hosi empreza nian hamutuk 2.457 no entidade empregadór rasik 171. Ita labele garante katak iha jullu nia-laran bele konklui tanba ita iha totál ema-ne’ebé rejistu iha INSS hamutuk 11.000-resin,” Longuinhos Armando Leite hateten ba Agência TATOLI, iha nia knaar fatin, Caicoli, Dili, sesta ne’e.

Prezidente INSS hatete, pagamentu ba faze dahuluk nian iha 05 jullu ba traballadór hosi empreza sira hamutuk 984 ho entidade empregadór na’in-69, ho orsamentu hamutuk millaun $1.036-resin (um miloens trinta seis mil ital).

Pagamentu ba faze daruak, Prezidente INSS hatete INSS hahú ona halo pagamentu ba fakultativu liu-liu ba negosiante kiik sira hamutuk 1.272 ho montante $238.000,74 no pagamentu faze datoluk ne’e INSS halo ona pagamentu ba benefisiáriu ba entidade empregadór sira hamutuk 1.473 ho entidade empregadór 102 ho osan $1.747.508.

“Pagamentu ne’ebé mak durante ita halo ba empregu sira agora daudaun kuaze $2.474.390 no restante ne’e sei iha prosesu ba pagamentu. Hosi totál osan aprovadu millaun $45.300 ho nia saldo millaun $42.835 ne’e, ita foin selu ba ema utioan de’it no barak mak seiduak. Maibé, nafatin esforsu halo verifikasaun no haruka tutuir ba BNCTL atu halo pagamentu,” nia dehan.

Aleinde ne’e, nia informa, agora dauduan idozu sira-ne’ebé simu ona osan hamutuk 38.408 ho totál hamutuk $6.888.940 no hela na’in-53.799 mak prosesu pagamentu hosi totál idozu iha territóriu nasionál 92.207, no saldo iha $9.758.480 hosi totál osan ne’ebé aloka hamutuk $16.647.420.

“Parese ita sei konklui iha fulan setembru nia-laran tanba iha munisípiu balun ne’e suku barak mak seidauk. Iha balun, hela postu ida ka rua de’it, entaun ami hamutuk ho BNCTL kontinua halo pagamentu. Maibé, idozu sira iha Dili kuaze hotu ona tanba idozu sira maiória uza ona Automated Teller Machine (ATM),” nia dehan.

Nia esplika, durante pagamentu ba idozu sira ne’e ekipa pagamentu hasoru dezafiu iha sistema, tanba dalaruma iha tinan uluk naran laiha no agora mós naran laiha maibé ekipa rezolve tuituir no pagamentu la’o ho di’ak.

“Bainhira ita halo pagamentu iha suku ida mak akontese hanesan naran laiha, benefisiáriu tenke relata mai ami atu ami bele rezolve lalais. Se bainhira ami muda ona ba suku seluk mak prosesu ne’e sei la’o oin seluk, tanba hein ba faze daruak,” nia hateten.

Notísia Relevante: Fulan ne’e, BNCTL hahú halo pagamentu ba idozu sira

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here