Espoza Prezidente Repúblika, Cidália Nobre Lopes Mouzinho Guterres, fó apoiu umanitária ba komunidade iha Aldeia Manu-Mata. Imajen Tatoli/Nelia Fernandes.

DILI, 16 jullu 2021 (TATOLI)—Espoza Prezidente Repúblika, Cidália Nobre Lopes Mouzinho Guterres, sesta ne’e hala’o vizita no apoia umanitária ba komunidade iha Aldeia Manu-Mata, Suku Bidau, Postu Administrativu Cristu Rei, Munisípiu Dili.

Notísia Relevante: Espoza PR fó apoia umanitária ba ema defisiente matan iha AHDMTL

“Atividade ida-ne’e nu’udar atividade kontinuasaun hosi Gabinete Espoza Prezidente Repúblika nian, ba liu asaun karidade nian. Ne’e nu’udar kontinuasaun ami-nia programa sosiál, atu mai fó apoiu tuir lista hosi xefe aldeia hato’o ba ami,” Espoza Prezidente Repúblika ne’e informa ba jornalista sira iha Suku Bidau, Aldeia Manu-Mata.

Apoiu umanitária ne’e hala’o bazea ba lista ne’ebé Ezpoza Prezudente Repúblika simu hosi xefe aldeia sira ho totál uma-kain 60.

“Ita hatene katak, durante inundasaun ita apoiu maibé ema barak mak seidauk hetan. Entaun ita haree katak nesesidade emerjénsia nian liu-liu ai-haan ne’e importante tebes, tanba ne’e ita labele hein iha fatin de’it. Ami husu ba autoridade sira liu-liu xefe aldeia sira atu hasai loloos lista ba ita-nia komunidade sira ne’ebé presiza tebes,” nia dehan. 

Iha sorin seluk, Xefe Aldeia, Bidau Manu-Mata, Beatriz da Costa Silva, agradese ho prezensa Espoza Presidente Repúblika hodi fó apoiu ba abitante sira.

“Durante ne’e nai ulun sira nunka tun ba iha komunidade nia leet, maibé ho prezensa Espoza Prezidente Repúblika nian ami kontente. Maibé ami mós sei prepara tán (proposta) hodi haruka ba tán, tanbá komunidade barak seidauk hetan ajudu,” Xefe Aldeia ne’e propoin.

Entretantu, apoia umanitária hosi Espoza Presidente Repúblika fó ba komunidade refere hanesan fós kilógrama 25 hamutuk saka 60, no fó mós apoia ba komunidade suku Kuluhun ho foos saka 58.

Totál família iha Aldeia Manu-Mata, Suku Bidau, Postu-Administrativu Cristu-Rei, Munisípiu Díli, hamutuk 483. 

Jornalista : Nelia Fernandes 

Editór       : Cancio Ximenes

HAKEREK NO HATÁN

Please enter your comment!
Please enter your name here