Prezidente CMRFF, Domingos Correia. Imajen TATOLI/Natalino Belo

BAUCAU, 16 jullu 2021 (TATOLI)—Prezidente Kooperativa Multi Setorál Roman Furak Fatumaka (CMRFF, sigla portugés), Domingos Correia do Rego, hakarak dezenvolve komunidade iha suku Gariuai liuhosi atividade kooperativa.

“Ita-nia mehi no esperansa ba futuru katak komunidade aldeia Uai-behe-ana suku Gariuai bele hetan informasaun no benefísiu hosi koperativa ida-ne’e, liuliu atubele sai membru kooperativa no hamutuk dezenvolve propriedade no prosperidade ba rai doben Timor-Leste ida buras liu,” Prezidente CMRFF hateten iha iha aldeia Uai-behe-ana zona Fatumaka, suku Gariuai, postu administrativu Baucau Villa, munisípiu Baucau, sesta ne’e.

Notísia relevante: Asembleia jerál CMRFF, SEKoop enkoraja membru fiar malu dezenvolve kooperativa

Domingos otomista, CMRFF nafatin iha esperansa ho kooperativa ne’ebé sei harii iha futuru mai, maski neneik maibé kontinua nafatin atividade ho rekursu limitadu.

Aleinde ne’e, durante ne’e seidauk asesu ajudu ruma hosi Governu, liuliu iha parte kréditu nian, Dirijente ne’e komprometidu nafatin eziste tuir kondisaun no vontade rasik.

“Atu dehan laduun iha avansu maka’as, maibé ami kontinua la’o neneik maibé beibeik,” nia subliña.

Dezafiu ne’ebé kooperativa ne’e hasoru mak menus rekursu umanu atu jere kooperativa dezenvolve sai di’ak liu no seluk mak tanba iha área rurál menus rendimentu atu halo empréstismu kooperativa.

CMRFF realiza asembleia jerál ba dala IV hodi halo reestrutura dirijente, ne’ebé seremónia abertura hosi Sekretáriu Estadu Kooperativa (SEKoop), Elizário Ferreira no Prezidente Autoridade Munisípiu (PAM) Baucau, Olívio ‘Bou Lesa’ Freitas.

Kooperativa lokál ne’e harii iha loron 12 dezembru 2012 maibé formalmente hahú atividade iha 2013, no hahú ho membru 16 ho kapitál inisiál $1.600 no to’o agora membru 74 ho kapitál $26.000 resin.

Jornalista : Natalino Belo

Editora    : Julia Chatarina

HAKEREK NO HATÁN

Please enter your comment!
Please enter your name here