Jestór Centro Juventude Becora, Flávio Sebastião da Costa. Imajen Tatoli/Nelia Fernandes.

DILI, 17 jullu 2021 (TATOLI)—Centro Juventude Becora (CJB), realiza formasaun kona-ba espíritu patriotizmu no nasionalizmu ba joven sira iha Becora, atu nune’e joven sira bele hatene istória pasada no respeita valór istóriku sira.

“Objetivu hosi formasaun ne’e atu prepara joven sira-ne’ebé iha responsabilidade ba moris rasik, no hahalok pozitivu hodi kontribui ba asaun patriotizmu no nasionalizmu,” Jestór CJB, Flávio Sebastião da Costa, informa ba Agência TATOLI, iha nia kna’ar-fatin, Becora, DIli, sesta ne’e.

Nia informa,  iha tinan 2020-2021 ne’e, formasaun ba patritizmu no nasionalizmu ne’e liga liu ba Masakre 12 Novembru-masakre Santa Crus ne’ebé sai pontu nakfilak ba Timor-Leste nia funu ne’ebé lori juventude loriku assua’in sira barak mak mate, atu nune’e joven sira bele aprende ba memória no istória pasada ne’e.

“Dala barak juventude sira laiha konsiénsia rasik. Dala ruma bandeira mós ita la respeita, hanesan ema hatún ita la’o liu de’it. Entaun, ho programa ne’e Governu fó fiar ba Komité 12 Novembru, atu fasilita joven sira atu respeita identidade Timor-Leste nian, liga ba partiotizmu no nasionalizmu,” nia dehan.

Nia esplika, patriotizmu ne’e ko’alia kona-bá rai katak tenke kuidadu rai Timor-Leste no patriotizmu ne’e ko’alia kona-bá pátria no povu.

“Uluk ema fiar malu hakarak ukun rasik-aan, maibé agora fiar malu, ida-idak fiar ninian. Hanesan grupu A, fiar grupu A no grupu B, fiar grupu B nian. Hosi ida-ne’e mak sentru ne’e oinsá atu kontribui ba valór síviku juventude nian liuhosi formasaun sira-ne’e,” nia dehan.

Nia dehan, formasaun ne’ebé la’o daudaun ne’e akumula partisipante iha na’in-100.

Aleinde ne’e Sentru Juventude Becora (CJB-sigla portugés), iha tinan 2020 to’o 2021, hala’o atividade despostiva hanesan realiza atividade Boxe (Boxing) hodi promove talentu juventude sira-nian.

Atividade Boxe ne’e hanesan atividade eventuál ne’ebé realiza iha loron nasionál rua (2) hanesan loron Konsulta Popular (30 Agostu) no Masakre Santa Cruz (12 Novembru) ne’ebé inisiativa ne’e maihosi komunidade iha CristoRei ne’e rasik.

“Ami rasik mak iha hanoin hakarak halo atividade ne’e ba iha itania loron istóriku sira. Hanesan iha loron 12 Novembru, tanbá ita hakarak hanoin fali juventude loriku assua’in sira nia luta iha Masakre Santa Cruz ne’ebé akontese iha loron 1991. Entaun iha loron ida-ne’e ita halo atividade ne’e, atu promove talentu foin sa’e siranian liuhosi atividade desportu,” nia dehan.

Iha tinan kotuk, partisipante ba atividade Boxe ne’e hamutuk 50 no hosi númeru ne’e inklui feto rua liuhosi grupu tinju Becora Boxing. Partisipante sira ne’e maihosi juventude sira hosi área Cristo Rei hanesan Suku Becora, Aldeia, ClakFuik, Maukoko Mate, no Kakeu Laran, arbitru no juri sira mai hosi nasionál.

Sentru Juventude Becora ne’e estabelese iha 19 abríl 2017, ne’ebé funda hosi ema na’in-lima, inklui sovrevente Masakre Santa Cruz-12 Novembru 1991, Sérgio Filomena Marquês “Amali”.

Formandu ne’ebé prodús hosi CJB ne’e hamutuk na’in 1058, hosi númeru ne’e 10% mak hetan ona serbisu no balun agora servisu iha Banku Nasionál Komersiu Timor-Leste (BNCTL-sigla portuges), Governu no Organizasaun Naun-Govermentál (ONG) sira.

Enkuantu, totál funsionáriu ba sentru ne’e rasik, hamutuk na’in-11, hosi númeru ne’e funsionáriu na’in-ualu (8), formadór na’in-tolu (3) no formadór sira mai hosi SOLS, estudante universitáriu sira.

Jornalista : Nelia Fernandes 

Editór       : Cancio Ximenes

HAKEREK NO HATÁN

Please enter your comment!
Please enter your name here