Empreza Sinmor Unipesoál no Losla Unipesoál entrega karreta ba autoridade RAEOA. Imajen Tatoli/Abilio Elo Nini.

OÉ-CUSSE, 16 Jullu 2021 (TATOLI)—Autoridade Rejiaun Administrativa Espesiál Oé-Cusse Ambeno (RAEOA) aloka osamentu $410,71 hodi sosa-tan karreta 11 no entrega espesiál ba ekipa saúde primaria iha sentru saúde iha sub-rejiaun haat atu atende komunidade iha área rurál.

Imajen Tatoli/Abilio Elo Nini.

“Autoridade RAEOA sosa ona karreta hanesan Pick-Up lima (5) oferese ba Sekretáriu Rejionál Asuntu Saúde, karreta haat (4) sei oferese ba sentru saúde sira no ida ba servisu vijilánsia servisu saúde rejionál atu apoiu distribuisaun bee-moos ba komunidade no kamioneta Mitsubishi rua (2) apoiu servisu edukasaun no Departementu Servisu Agua Saneamentu (DSAS),” Sekretaria Rejionál Asuntu Finansas, Maria Eliza Maniquin, hateten iha serimónia entrega karreta hosi empreza Sinmor Unipesoál no Losla Unipesoál ba autoridade RAEOA iha edifisiu ZEESM, Oé-Bau, Oé-Cusse, sesta ne’e.

Prosesu tenderizasaun ba karreta hirak ne’e hala’o ona iha 2020 no pagamentu ne’e foin halo iha 2021 liuhosi Orsanmentu Jerál Estadu 2021. Karreta ba bee-moos nian tanke haat (4) ho nia montante rihun $140, ba kamioneta mitsubishi rua (2) nia montante rihun $70 no kareta vijilánsia lima (5) ho montante rihun $200.17.

Entretantu Prezidente Autoridade RAEOA, Arsenio Paixão Bano sente kontenti tanba ho apoiu karreta hirak ne’e sei haforsa liután servisu autoridade nian liu-liu kuidadu saúde primaria iha sentru saúde sira.

“Ha’u hanoin apoiu karreta sira-ne’e, autoridade sei forte liutá atu presta servisu ba komunidade maske karreta balun seidauk mai. Karreta pick-up lima (5) ne’e importante tebes tanba karreta haat (4) dezkola ba sentru saúde sub-rejionál sira, ida ba vijilánsia atu ita bele haka’as ita nia servisu kuidadu saúde primaria ninian,” Arsénio Paixão Bano hateten,

Aliende ne’e, karreta hirak ne’e sei apoiu servisu ba área saúde no área Edukasaun, no servisu seluk tanba kaereta tanke bee nian haat (4) ne’e sei sentraliza iha sub-rejioaun Pasabe, Oésilo, Nitibe no Pante Makasar tanba autoridade halo perfurasaun bee-moos iha fatin barak.

Empreza Sinmor Unipesoál no Losla Unipesoál entrega karreta ba autoridade RAEOA. Imajen Tatoli/Abilio Elo Nini.

Iha futuru, nia dehan, iha problema ba bee-moos la persiza karreta hosi vila maka sa’e ba foho hodi distribui bee-moos, maibé kamioneta rua (2) ne’e ida atu apoiu Departementu Servisu Agua no Saneiamentu (DSAS) no ida ba apoiu servisu Sekretáriu Rejionál Asuntu Edukasuan no Solidariedade Sosiál.

Entretantu Sekretáriu Rejionál Asuntu Saúde, Manuel da Costa, hateten objetivu hosi apoiu karreta lima (5) ne’e ba área saúde ninian importante ba servisu asistensia saúde ba komunidade sira iha área rurál.

“Ohin, Prezidente Autoridade entrega karreta lima (5) ba parte saúde atu apoiu centru saúde haat (4) iha sub-rejiaun no servisu saúde rejionál. Ida-ne’e importante tanba bele fasilita tan servisu sira iha atensaun primaria iha sentru saúde sira atu bele hala’o vizita ba komunidade sira no lori asistensia saúde ba iha área remota, nomós hala’o atividade saúde familia no fasilita kazu grave iha sentru saúde sira labele atende entaun bele transporta urjensia ba iha Hospitál Referál Oé-Cusse nian,” nia dehan.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here