Kondisaun atuál iha Suku Kolimau, kinta (16/07/21). Imajen Tatoli/Sérgio da Cruz.

BOBONARO, 16 jullu 2021 (TATOLI)—Família 245 hosi aldeia Lodasi, Biamua no Tegu-abe iha suku Kolimau, postu administrativu Bobonaro, munisípiu Bobonaro, seidauk asesu eletrisidade.

“Aldeia tolu mak la asesu eletrisidade. Iha balun ne’ebé iha osan oitoan sira sosa solar panel. Maibé, maioria sunu kamí, tanba populasaun maioria moris ho vida agrikultura,” Xefe suku Kolimau, Arménio Guterres Moniz, hateten ba jornalista Agência Tatoli, iha Ramaskora, kinta ne’e.

Notísia relevante:2021, serbisu edukasaun munisípiu Bobonaro implementa projetu 23

Autoridade lokál ne’e aprezenta ona situasaun ne’e ba Prezidente Eletrisidade Timor-Leste (EDTL, E.P) anteriór, iha tinan 2020, maibé to’o agora seidauk iha resposta.

Alende ne’e, populasaun iha suku ne’e mós enfrenta difikuldade kona-bá estrada ne’ebé kondisaun aat tebes no susar atu transporta  produtu lokál ba merkadu iha Bobonaro villa.

Suku Kolimau iha produtu lokál hanesan kafé, liis, fehuk roupa, koto no mós kada tinan agrikultór-sira sempre prodúz hare ho kuantidade ne’ebé boot.

Suku Kolimau iha aldeia lima mak hanesan, Lodasi, Tegu-abe, Biamua, Manumea no Atublogu ho totál populasaun 2.175 mai hosi uma-ka’in 463.

Jornalista: Sèrgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here