Tribunál Rekursu (TR), oferese karreta Toyota Prado haat ba Komandu Polísia Nasionál Timor-Leste (PNTL), munisípiu Dili, kinta (15/07/21). Imajen Tatoli/Nelson de Sousa.

DILI, 15 jullu 2021 (TATOLI)—Tribunál Rekursu (TR), oferese karreta Toyota Prado haat ba Komandu Polísia Nasionál Timor-Leste (PNTL), munisípiu Dili.

Diretór Jerál Jestaun Patrimóniu Estadu, Januário da Gama, hateten Ministériu Finansa liuhosi Diresaun Jerál Patrimóniu Estadu, simu pedidu ida hosi TR, hodi halo transferénsia viatura hirak-ne’e ba PNTL Dili, nune’e bele utiliza.

Notísia relevante:PNTL Dili presija transporte atu hala’o patrullamentu

“Partikularmente insitituisaun PNTL mak sai benefisiáriu, tanba ne’e mak realiza transferénsia ne’e,” Januário da Gama hateten ba jornalista-sira iha edifísiu TR, Caicoli, kinta ne’e.

Iha Dekretu lei númeru 32/2011 artigu 9 estipula kondisaun ne’e, bainhira iha instituisaun ida iha bens ruma bele halo fila-fali transferénsia ba instituisaun seluk re-afetasaun, tanba instituisaun ne’e la utiliza ona.

Nia hatutan, Governu hetan doasaun viatura ne’e hosi misaun Organizasaun Nasaun Unida (ONU, sílga portugés) iha 2006, hodi halo transferénsia mai iha TR, loloos tama lelaun ona, maibé iha pedidu hosi PNTL Dili hodi responde bele utiliza.

Patrimóniu Estadu rekomenda ba PNTL atu halo jestaun no manutensaun nune’e utiliza ba tinan ida ka rua tan, hafoin bele halo leilaun.

Iha fatin hanesan, Diretór Jerál TR, Eugénio Soares, hateten TR utiliza karreta sira-ne’e hahú 2013 no daudaun-ne’e kondisaun di’ak hela hodi bele apoia serbisu PNTL.

Marka prezensa iha serimónia transferénsa ne’e, Segundu Komande PNTL Dili, Superintendente, João Belo Sanches.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here