Primeiru-Ministru, Taru Matan Ruak, troka nota deklarasaun koligasaun merenda eskolar ho Reprezentante ONU iha Timor-Leste, Roy Trivedy, iha salaun PCM, kuarta (14/07). Imajen TATOLI/Francisco Sony

DILI, 15 jullu 2021 (TATOLI)–Governu Timor-Leste hamutuk ho Organizasaun Nasaun Unida (ONU) selebra akordu deklarasaun koligasaun ba merenda eskolár ho tema ‘nutrisaun, saúde no edukasaun ba labarik sira hotu’.

Tuir nota ne’ebé Agência TATOLI asesu iha kinta ne’e, Akordu ne’e asina iha kuarta (14/07) hosi Xefe Governu no Koordenadór Rezidente ONU iha Timor-Leste, Roy Trivedy, ne’ebé reprezenta Parseiru sira hanesan Programa Ai-han Mundiál (WFP, sigla portugés), Food and Agriculture Organization (FAO), United Nations Children’s Emergency Fund (UNICEF) no World Health Organization (WHO).

Diskursu Primeiru-Ministru, Taru Matan Ruak iha ambitu asinatura deklarasaun koligasaun merenda eskolar, iha salaun PCM, kuarta (14/07). Imajen TATOLI/Francisco Sony

“Akordu ne’e sei kontribui sertamente enkoraja partisipasaun estudante sira atu diminui absentismu ba eskola aleinde programa ne’e, bele ajuda dudu produsaun nasionál ai-han nutritivu, saudável no amigável ho ambiente,” Primeiru-Ministru (PM), Taur Matan Ruak, hateten iha ninia intervensaun iha ámbitu selebrasaun akordu ne’e, iha salaun Prezidénsia Konsellu Ministru (PCM, sigla portugés), Palásiu Governu.

Inisiativu ne’e ho objetivu atu renova kompromisu komun entre ajénsia ONU no Governu atu apoiu refeisaun merenda eskolár ne’ebé importante hodi hasa’e kreximentu saudável labarik sira.

Deklarasaun ida-ne’e hanesan reafirmasaun koletivu hodi hamenus má nutrisaun, hadi’a seguransa ai-han, no hakat ba konsumu ai-han saudável, seguru no sustentável.

Xefe Ezekutivu konsidera importante atu reinforsa esforsu mobilizasaun hodi hakotu hamlaha no má nutrisaun, enkoraja partisipasaun másimu no ativu, envolvimentu foinsa’e feto no setór públiku no privadu iha estabelesimentu alimentasaun komunidade ne’ebé maka fornese ba ema hotu no la husik ema ida iha kotuk.

Diskursu Reprezentante ONU iha Timor-Leste, Roy Trivedy, iha ámbitu asinatura nota deklarasaun koligasaun merenda eskolar, iha salaun PCM, kuarta (14/07). Imajen TATOLI/Francisco Sony

Iha biban hanesan, Koordenadór Rezidente ONU agradese ba Timor-Leste tanba selebra ona akordu hodi apoia merenda eskolár.

“Akordu ne’e importante tebes ba Timor-Leste tanba hafoin pandemia, defísil atu atrai labarik rekomese iha eskola, entaun programa ne’e importante ba labarik sira iha eskola”, Roy Trivdy dehan.

Merenda eskolár importante tanba akresenta nutrisaun ba labarik feto no mane, nune’e ho selebrasaun akordu ne’e hatudu kompromisu Governu Timor-Leste atu apoia melloramentu ba populasaun iha área nutrisaun no seguransa alimentár.

Seremónia ne’e partisipa hosu Ministru Edukasaun Juventude no Desportu, Armindo Maia, Reprezentante WFP, Dageng Liu, Reprezentante Organizasaun Mundiál Saúde (OMS), Arvid Mathur, Reprezentante UNICEF, Bilal Aurang Zeb Durrani, Pontu Fokál movimentu Scaling Up Nutrition (SUN),  Filipe da Costa.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here