Produtu lokál iha Merkadu Taibesi. Imajen TATOLI/António Gonçalves

DILI, 15 jullu 2021 (TATOLI)--Sosiedade Sivíl iha Timor-Leste, kompostu hosi La’o Hamutuk, PERMATIL, HASATIL no Kooperativa Kamponeza  Maubere (CCM) entrega ona karta ba Ministru Agrikultura no Peska (MAP), Pedro dos Reis, atu lori aspirasaun povu hanesan informasaun importante ba simeira mundiál kona-ba sistema ai-han ka Food Systems Summit.

“Ami husu ba Ministru Agrikultura no Peska atu lori lian povu ba simeira mundiál. Iha karta ami hato’o rekomendasaun neen inklui husu ba Ministru atu kestiona knaar World Economic Forum (WEF) iha simeira globál ne’ebé limita povu nia partisipasaun no uza oportunidade simeira atu loke diskusaun kona-ba knaar sosiedade sivíl no grupu to’os-na’in iha governasaun Organizasaun Nasaun Unida (ONU) no promove akontabilidade no inkluzaun iha prosesu refere,” Peskizadór La’o Hamutuk, Celestino Gusmão, relata, liuhosi nota ne’ebé Agência TATOLI asesu, kinta ne’e.

Simeira globál ne’e, ho objetivu atu fó dalan ba nasaun ida-idak atinje meta Objetivu Dezenvolvimentu Sustentável (ODS) no oinsá dezenvolve planu asaun atu hametin sistema ai-han iha mundu.

Ministru Agrikultura no Peska sei partisipa pra-simeira iha jullu nia rohan no partisipa mós iha votasaun finál iha setembru iha, Nova Iorke.

ONU kolabora no serbisu hamutuk ho WEF hodi organiza no fasilita simeira mundiál ne’e.

WEF nu’udar organizasaun ne’ebé reprezenta interese kompañia boot sira liu 1000 resin.

Tanba ne’e, nota ne’e esplika sosiedade sivíl iha Timor-Leste inklui iha mundu tomak analiza no haree katak konkordánsia entre ONU no WEF hodi realiza simeira mundiál ne’e sei loke dalan de’it ba kompañia boot mak partisipa ho sira-nia interese ida-idak, do que buka dalan no solusaun ba povu agrikultór no kamponéz kiik sira.

Tanba ne’e ONG lamenta partisipasaun WEF iha simeira mundiál tanba bainhira governasaun sistema ai-han domina hosi kompañia multinasionál boot sira, sei labele rezolve problema estruturál ne’ebé kauza ba hamlaha, kiak, má nutrisaun no dezigualidade oin-oin ne’ebé halo povu barak iha mundu kontinua moris kiak no susar.

Simeira mundiál ho modelu no lala’ok sira hanesan ne’e sei la hamosu solusaun di’ak no justu ba povu kiik no kiak sira inklui ba nasaun kiik no kiak sira hanesan Timor-Leste.

Bazeia ba esperiénsia iha Timor-Leste, intervensaun ba iha setór agrikultura sei la efetivu bainhira la inklui povu iha prosesu sira.

“Ami lamenta no kestiona katak simeira mundiál sistema ai-han ne’e sei fó prioridade ba kompañia boot do que akomoda agrikultór kiik sira-nia partisipasaun. Kompañia boot sira-nia solusaun mak hanesan produsaun industriál no kontinua foka ba implementasaun solusaun téknika ne’ebé la bele rezolve hamlaha ka hametin sistema ai-han,” Celestino Gusmão argumenta.

La’o Hamutuk no sosiedade sivíl sira seluk fiar katak povu Timor-Leste iha perspetiva diferente no koñesimentu relevante no importante, ne’ebé Ministru ho ekipa sei partisipa no bele lori ba fórum globál ne’e.

Sosiedade Sivíl husu mós Ministru atubele fahe Timor-Leste nia esperiénsia ho agrikultura familiar inklui sistema agrikultura sustentável, agro-ecology no produsaun orgániku atu enkoraja partisipante iha simeira ativu no promove solusaun sustentável.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here