Prezidente Repúblika, Francisco Guterres "Ló Olo". Imajen Tatoli/Francisco Sony

DILI, 15 jullu 2021 (TATOLI)—Prezidente Repúblika, Francisco Guterres Lú Olo husu funsionáriu públiku no ajente Estadu sira atu asume kargu ho efisiénsia no kualidade hodi serví Estadu no povu tomak ho di’ak liután.

Notísia Relevante: MS responsabiliza komemorasaun Funsaun Públika dala-VII ho tema saúde

“Hein mós ita-boot sira respeitu ba prinsípiu legalidade, transparénsia no imparsialidade hanesan dalan hotu-hotu nian atu servi di’ak liután ita-nia Estadu no povu tomak,” Prezidente Repúblika hateten liuhosi diskurusu iha serimónia komemorasaun Loron Funsaun Públika ba dala-VII ho tema “Ábitu Saudável no Vasinasaun Hasoru COVID-19, Nu’udar Dalan ba Nova Normalidade ba iha Atendimentu Públiku’, iha salaun Laline Larigutu, Colmera, Dili, kinta ne’e.

Tema importante ne’e bolu atensaun mós ba programa vasinasaun ne’ebé Ministériu Saúde hala’o daudaun hodi kontra COVID-19, nu’udar esforsu bo’ot ida hosi Governu Timor-Leste atu prevene, nune’e povu tomak bele fila-fali ba moris baibain hodi haburas dezenvolvimentu sustentável iha país ne’e.

Objetivu jerál hosi selebrasaun ne’e atu promove knaar funsaun públika nian ba dezenvolvimentu funsionáriu sira-nian hodi hala’o sira-nia knaar iha instituisaun Estadu, atu serví povu ho étika no profisionalizmu.

Prezidente Repúblika husu ba direjente administrasaun públika atu kapasita, motiva, enkoraja no valoriza liután funsionáriu públiku no ajente públiku ida-idak ne’ebé hala’o hela ninia knaar ho exelente.

Importante tebes katak funsionáriu no ajente públiku ida-idak envolve-an iha vida instituisaun nian ho idéia no asaun, ho matenek ida-idak nian iha prosesu hadi’ak servisu Estadu nian atu serví di’ak liután Povu Timor-Leste.

Iha fatin hanesan, Prezidente Komisaun Funsaun Públika (KFP), Faustino Cardoso husu ba ajente administrativa hotu-hotu ne’ebé asume responsabilidade iha ámbitu pandemia COVID-19 atu serví populasaun iha nasaun ne’e ho responsabilidade.

“Difikuldade maihosi kalamidade natureza ne’ebé enfrenta iha tinan kotuk. Maibé, ida-ne’e mak dezafiu mai ita halo reflesaun oinsá enkoraja-an iha knaar no servisu di’ak liután, no nafatin alertadu ameasa hosi inimigu invizivel COVID-19,” Prezidente KFP hateten.

Kona-ba funsionáriu públiku ne’ebé idade reforma, nia dehan, asuntu ne’e iha ona Parlamentu Nasionál atu avansa ona proposta alterasuan lei kona-ba seguransa sosiál nian hodi nune’e komtempla no hatuur iha artigu ruma, nune’e bele limite idade servisu ativu iha funsaun públika nian.

Komisaun Funsaun Públika (KFP) sei halo komunikasaun ho Parlamentu Nasionál (PN) no PN prontu tau iha prioridade proposta altersaun lei seguransa sosiál hodi hatuur definisaun limite idade servisu ativu, nune’e funsionáriu ida-idak hatene nia knaar to’o tinan saida mak bele reforma.

Antes ne’e, Prezidente Komisaun Funsaun Públika (CFP-sigla portugés), Faustino Cardoso, husu reprezentante povu sira atu hamosu artigu ida iha dekretu-lei númeru 24/2016, 29 juñu, ne’ebé hetan ona alterasaun dahuluk ba dekretu-lei númeru 27/2008, 11 agostu kona-ba Rejime Jerál Karreira iha Administrasaun Públika, nune’e regula funsionáriu sira-ne’ebé tama ona idade avansada.

Nia infroma, totál funsionáriu públiku to’o agora hamutuk 34.413 no hosi totál ne’e, funsionáriu rihun 5-resin mak atu ba reforma ona no funsionáriu permanente 26.000-resin.

Notísia Relevante: CFP husu PN altera lei reforma regula funsionáriu idade avansada

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here