Vasina Sinovac. Imajen TATOLI/António Gonçalves.

COVALIMA, 15 jullu 2021 (TATOLI)—Diretór Serbisu Saúde munisípiu Covalima, Filipe Pereira, husu ba pesoál saúde iha Sentru Saúde no Postu saúde-sira, tenke kontrola vasina atu bele garante kualidade bianhira fó ba komunidade.

“Postu saúde-sira laiha eletrisidade, ami la tau vasina iha zelera, tanba ne’e bele fó impaktu ba kualidade vasina. Entaun, fó-hanoin ba pesoál saúde-sira tenke kontrola, bainhira eletrisidade dezligadu durante oras haat to’o lima, tenke evakua vasina mai iha munisípiu,” Filipe Pereira Lemos hateten ba jornalista Agência Tatoli iha kna’ar-fatin, kinta ne’e.

Notísia relevante:Covalima hahú sensibilizasaun kona-bá variante delta

Filipe hatutan, foin lalais ne’e akontese eletrisidade lakan-mate iha postu administrativu Fohorem, nune’e fó impaktu ba kualidade vasina, enkuantu kondisaun zelera ladún estábel. 

Ho ida-ne’e maka, Filipe Pereira orienta ona ekipa saúde hosi munisípiu to’o ona iha fatin refere, hodi evakua vasina ba Sentru Saúde Munisípiu atu bele asegura.

To’o 28 juñu 2021, abitante 7.000-resin iha Munisípiu Covalima simu ona vasina AstraZeneca doze daruak ka vasina kompletu.

Jornalista       : Celestina Teles 

Editór             : Francisco Simões

HAKEREK NO HATÁN

Please enter your comment!
Please enter your name here