Ministru Ensinu Superiór, Siénsia no Kultura (MESSK), Longuinhos dos Santos. Imajen TATOLI/ Egas Cristóvão

DILI, 15 jullu 2021 (TATOLI) – Ministériu Ensinu Superiór, Siénsia no Kultura (MESSK) hahú disemina kadernu padraun lisensiamentu ba entidade sira ne’ebé iha vontade atu loke Instituisaun Ensinu Superiór foun.

Ministru MESSK Longuinhos dos Santos hateten, kadernu padraun lisensiamentu ba Instituisaun Ensinu Superiór Públiku no Privada ne’e hetan aprovasaun liuhosi despaixu Ministeriál númeru 90/GIEM-MESSK/II/2020. Ne’ebé hatuur regra preparasaun proposta lisensiamentu ba IES foun sira.

Nia esplika kadernu padraun lisensiamentu ba IES foun ne’e bazeadu bá rekizitu ne’ebé hatuur ona iha dekretu lei númeru 8/2010 kona-ba rejime jurídiku Ensinu Superiór nian. Nune’e mós hatuur iha diploma ministeriál númeru 13/GIEM/MEJD/II/2017 hodi fó lisensiamentu atu estabelese IES foun sira.

Diretora Jerál Ensinu Superiór no Siénsia Maria Filomena Lay konsidera diseminasaun ne’e nu’udar polítika ida atu ajuda Instituisaun Ensinu Superiór foun sira bainhira atu aprezenta proposta hodi estabelesimentu instituisaun foun.

Maria dehan, diseminasaun ne’e halo mós bá Instituisaun Ensinu Superiór 18 ne’ebé eziste ona inklui instituisaun forsa defeza no seguransa no dirijente balun hosi instituisaun ensinu sekundáriu sira atu nune’e bele hetan koñesimentu di’ak liután ba informasaun ne’e.

Fó ona lisensiamentu ba IES haat

Ministériu Longuinhos dos Santos, konsidera tinan ida-ne’e sira la simu proposta atu harii Instituisaun Ensinu Superiór foun, maibé dezde 2018-2021 ne’e iha ona IES foun haat maka hetan ona lisensiamentu.

Ministru Ensinu Superiór Siénsia no Kultura (MESSK) Longuinhos dos Santos konsidera tinan ne’e seidauk simu proposta foun atu loke tan instituisaun foun. Maibé iha instituisaun foun haat mak hetan ona lisensa operasionál dezde 2018 to’o ohin loron.

Instituisaun foun haat ita fó ona lisensa ne’e maka João Saldanha University (JSU), Institutu Don Boaventura Betanu, Institutu São João de Brito Casait no Institutu Politéknika Betanu.

Prezidente Institutu Politéknika Betanu (IPB), Acácio Cardoso afirma katak prosesu ensinu aprendizajen akadémiku iha IPB la’o normál tuir kalendáriu akadémiku nian.

IPB nu’udar Instituisaun Públiku moris hosi orsamentu jerál estadu kada tinan instituisaun ne’e foin realiza graduasaun dahuluk iha tinan kotuk no prepara mós atu hetan avaliasaun hosi ANAAA.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here