Prezidente Komisaun D, ne’ebé trata asuntu ekonomia no dezenvolvimentu, Deputadu Antoninho Bianco. Imajen TATOLI/Egas Cristovão

DILI, 15 jullu 2021 (TATOLI)—Komisaun D ne’ebé trata asuntu Ekonomia no Dezenvolvimentu, konsidera implementasaun programa Cesta Bázika motiva agrikultór sira halo to’os no natar.

Notísia Relevante: Programa cesta bázika valoriza produtu lokál

“Tuir avaliasaun, Cesta Bázika ne’e dada ema barak halo produsaun no ninia efeitu mak agrikultór sira komesa badinas halo to’os no natar. Hein katak Governu mós halo avaliasaun no ami avalia katak ninia efeitu ne’e pozitivu,” Prezidente Komisaun D, Deputadu Antoninho Bianco, informa ba Agência TATOLI, iha uma fukun, kinta ne’e.

Komisaun D akompaña prosesu distribuisaun programa refere iha kompañia balun la fó satisfasaun ba benefisiáriu balun, tanba fahe sasán halo sira la kontente maibé kompañia barak mak halo serbisu ho di’ak.

“Atividade produtivu populasaun sira komesa halo natar barak, produsaun iha merkadu iha tanba sei sosa no sei fahe fali ba benefisiáriu sira. Ita hein Governu aprezenta orsamentu 2022, sira-nia orsamentu atu aplika hanesan uluk ne’e ka oinsá,” nia dehan.

Komisaun D halo fiskalizasaun nota katak iha terrenu ema balun hahú hakiak animál, balun halo to’os no natar, entaun produsaun agora sa’e no la hanesan ho tinan sira uluk tanba la’ós hosi katuas sira de’it mak tama to’o no natar maibé joven sira mós halo ona atividade ida-ne’e.

“Implementasaun programa Cesta Bázika ne’e jerál tanba loja sira husik benefisiáriu sira mak hili sasán rasik, entaun iha Dili di’akliu. Maibé, iha suku sira-ne’e komunidade barak mak satisfeitu ho fahe sasán Cesta Bázika ne’e tanba balun oho karau no balun laiha ne’e depende ba kompañia sira,” nia dehan.

Prezidente Komisaun D nota katak, problema ne’ebé kompañia hasoru mak kestaun finanseira entaun iha impelementasaun ladún efikásia no efisiénsia.

“Kompañia balun aproveita iha zona rurál ne’e hodi bobar fali benefisiáriu sira, tanba ne’e Komisaun D iha ona planu atu halo fiskalizasaun ba iha fatin tolu, hanesan Ermera, Suai nomós iha Ainaro tanba iha asuntu balun kestiona kona-ba distribuisaun Cesta Bázika ne’e. Maibé jeralmente Cesta Bázika iha efeitu pozitivu ba populasaun,” nia dehan.

Nia hatutan, populasaun balun la kontente tanba hahalok hosi kompañia. Dalaruma kompañia sira hakarak manán maka’as liu fali benefisiáriu sira, entaun kompañia halo benefísiariu sira sai fali vítima.

Tanba ne’e, Prezidente Komisaun D ne’e husu Komisaun Antí Korrupsaun (CAC-sigla portugés), Provedoria Direitu Umanu no Justisa (PDHJ-sigla portugés) no Sosiedade Sivíl sira tenke kontinua monitoriza implementasaun programa cesta bázika ne’e.

Notísia Relevante: Programa Cesta Bázika fó benefísiu ba komunidade no empreza nasionál

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here