Tékniku EDTL halo instalasaun ba liña distribuisaun eletrisidade iha Dili, kinta (04/03). Imajen TATOLI/António Gonçalves

DILI, 15 jullu 2021 (TATOLI)—Vise-Prezidente Konsellu Administrasaun no Komisaun Ezekutivu Atendimentu Korporativu EDTL,E.P, José Cabral Belo, informa hahú hosi fulan-janeiru to’o juñu kobre reseita millaun $15,9 hosi kliente.

“Ami rekolla no hatama ona reseita ba kofre Estadu, hosi janeiru to’o 30 juñu hamutuk $15.934.792,11,” Vise Prezidente EDTL,E.P informa iha ninia knaar fatin Caicoli, kinta ne’e.

Reseita hirak ne’e rekolla hosi fonte tolu mak hanesan prepagu elétrisidade, ligasaun foun kontadór no kompañia-sira ne’ebé aluga poste.

“Ita haree iha fulan neen nia laran kompañia telekomunikasaun sira ne’ebé aluga poste sira ne’e hatama reseita ho montante $125.000 no ba ligasaun foun $66.000,” nia akresenta.

Vise-Prezidente empreza estatál ne’e rekoñese katak reseita hosi EDTL,E.P seidauk bele kobre gastu kombustível iha sentrál elétrika Hera no Betano tanba kada tinan Governu liuhosi Ministériu Obra Públika (MOP) prevee orsamentu ba kombustível hamutuk millaun $106, enkuantu reseita ne’ebé kobre durante tinan ida la to’o $50.

“Ita-nia reseita seidauk bele akomoda gastu produsaun enerjia ne’ebé boot tebes,” nia hatutan.

Jornalista: Florêncio Miranda Ximenes

Editora    : Julia Chatarina

HAKEREK NO HATÁN

Please enter your comment!
Please enter your name here