Diretora Ezekutiva Forum Komunikasaun Feto Timor Lorosa'e (FOKUPERS), Maria Fátima Perreira Guterres. Imajen/Espesiál

DILI, 15 jullu 2021 (TATOLI)—Forum Komunikasaun Feto Timor Lorosa’e (FOKUPERS-sigla indonézia), rekomenda pontu lubuk ida Parlamentu Nasionál (PN), atu konsidera iha projetu-lei ba labarik sira no joven iha perigu.

Notísia Relevante: Komisaun F realiza audiénsia públika kona-ba projetu-lei protesaun labarik-joven iha perigu

Diretora Ezekutiva FOKUPERS, Maria Fátima Perreira Guterres, louva ho Parlamentu Nasionál ne’ebé inísia projetu-lei ne’e maibé importante mak bele responde kestaun espesifíku sira hanesan vitíma sira iha uma mahon no labarik sira.

Nia dehan, dalabarak FOKUPERS buka mekanizmu atu-bele fasilita vitíma sira, maibé tanba laiha polítika entaun dalabarak liu FOKUPERS susar atu lori labarik sira iha prosesu edukasaun no asesu ba saúde.

“Iha prosesu aprendizajen ba edukasaun, ne’ebé liga ho asuntu seguransa no konfidensialidade, entaun Parlamentu Nasionál atu haree mós ba kazu espesifíku sira, oinsá mak ami bele lori alin vítima sira asesu ba iha saúde,” Diretora Ezekutiva FOKUPERS informa ba Agência TATOLI, iha nia kna’ar-fatin, Farol, DIli, kinta ne’e.

Nia haktuir, kestaun espesifíku hanesan responsável no sensível ba iha asuntu labarik sira maibé iha implementasaun seidauk la’o di’ak, tanba kestaun ba edukasaun no dalaruma FOKUPERS mós susar atende vítima lori ba iha ospitál.

“Ne’e ladún iha fatin ne’ebé seguru ba sira liga ho asuntu seguransa no konfidensialidade. Entaun dala ruma maluk sira-ne’ebé akompaña vítima sira, maibé sira ladun deskansa di’ak, tanba sira tenke asegura duni alin vítima sira-nia privasidade no seguransa iha-ne’ebá,” nia dehan.

Diretora Ezekutiva FOKUPERS ne’e husu PN presiza konsidera hamosu artigu espesifíku ne’ebé atu haree kona-ba prizaun ba iha labarik sira, tanba ne’e previzaun ba dook.

“Presiza halo diferénsa prizaun ne’ebé ita hanoin atu halo ba labarik sira, la’ós hanesan prizaun adultu nian maibé ita presiza karik ita bele konsidera prizaun iha laran. La’os modelu kastigu maibé ho modelu edukativu atu-bele hanorin labarik sira no hadi’a sira-nia situasaun psíkolojia hodi prepara sira fila-fali ba eskola,” nia fó hanoin.

Nia propoin atu lei ne’e tenke inkluziva nune’e inklui defisiente sira iha projetu-lei protesaun ba labarik no joven iha perigu ne’e. Nune’e, projetu-lei ne’e sai ba lei reprezenta duni labarik no foin sa’e sira no bele sensível iha sosiedade.

Nia husu Komisaun F ne’ebé trata asuntu saúde, seguransa sosiál no igualdade jenéru no Komisaun A ne’ebé trata asuntu konstitusionál no justisa, presiza haree mós esbosu lei rua tuan hodi konjuga ho projetu-lei foun ne’e.

“Ita ta’uk mak iha lei kestaun rua ida ba foin sa’e no ida ba labarik depois ita halo sai ida, ninia nesesidade la hanesan iha-ne’ebá,” Diretora Ezekutiva FOKUPERS ne’e fó hanoin ba Komisaun F no A.

FOKUPERS husu Parlamentu Nasionál diskute kle’an ba projetu-lei ne’e nune’e sai ba lei bele implementa ho di’ak, tanba realidade lei barak la kondiz ho implementasaun iha terrenu.

“Ita ta’uk mak to’o lei ne’e konsege prodús ho pájina no artigu barak, maibé nia konteudu ne’e ladún todan,” nia dehan.

Notísia Relevante: F-FCJ husu PN introdús projetu-lei protesaun labarik ho inkluziva

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here