Eskola ESP númeru 02 Villa nova, Baucau. Imajen TATOLI/Natalino Belo

BAUCAU, 15 jullu 2021 (TATOLI)–Adjuntu Diretór Eskola Ensinu Sekundáriu Públiku (ESP) númeru 02, Villa nova, Baucau, Titos Almeida, hateten, Forsa Navál hosi Estadu Unidu Amérika (EUA) atu konstrui sala aula iha tinan ne’e.

“Ami hein de’it tanba semana kotuk Forsa Navál sira mai ona no hosi parte edukasaun munisipál inklui nasionál hateten antes atu halo konstrusaun sei informa ba parte eskola,” Adjuntu Diretór Eskola informa iha ninia knar fatin, kinta ne’e.

Titos esplika, planu konstrusaun eskola ESP 2 Baucau hosi Forsa Navál amerikadu hahú kedan iha tinan 2019 bainhira ekipa hosi forsa diretamente observa kondisaun eskola, molok konstrui Eskola Bázika Sekundária siklu 3 suku Seiçal ne’ebé inaugura ona iha segunda (12/07).

Notísia relevante: EUA komprometidu kontinua apoia setór edukasaun iha Timor-Leste

Nune’e, hosi rezultadu koversa ikus ho dirijente eskola, halo karta pedidu ba Embaixada EUA ho Autoridade suku ne’ebé jeográfikamente hola parte iha líder komunitáriu.

“Kompetente Navál mai halo observasaun hafoin konversa, entaun momentu ne’e ami halo pedidu ba Embaixada EUA inklui Xefe suku Buibau hanesan área jurídika ba ESP 2,” nia haktuir.

Antes ne’e Embaixador EUA iha Timor-Leste, Kevin Blackstone, hateten, nia parte komprometidu apoia Governu iha setór edukasaun no tempu besik Forsa Navál EUA sei konstrui sala aula haat iha ESP númeru 2 Baucau ho kustu konstrusaun $350.000.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here