Atendimentu kliente iha sukursál BNCTL. Imajen/BNCTL

DILI, 15 jullu 2021 (TATOLI)–Banku Nasionál Komérsiu Timor-Leste (BNCTL, sigla portugés) inaugura edifísiu foun iha Ainaro iha semana kotuk ne’e no iha biban ne’e selebra mós aniversáriu bankária timor-oan ba dala-X ne’ebé transforma Institute of Microfinance (IMfTL) ba BNCTL.

Biban ne’e, Banku Nasionál ne’e ofisialmente lansa lema foun ‘Moris ba imi, Buras ho imi’, ne’ebé signifika BNCTL mai no sei buras hosi timor-oan nia propriedade.

Tuir nota ne’ebé Agência TATOLI asesu iha kinta ne’e, konstrusaun edifísiu foun iha Ainaro konklui iha besik tinan-tolu nia laran, ho totál investimentu inklui fasilidade no mobiliáriu hamutuk $800.000 liuhosi dezafiu oin-oin molok no hafoin konstrusaun.

“Objetivu hosi investimentu infraestrutura foun ne’e reprezentante no sai nu’udar realizasaun ba komprimisu BNCTL hodi fornese servisu melloradu ba kliente, populasaun no entidade públiku no privadu iha Ainaro, ne’ebé sai mós nu’udar kontribuisaun ba dezenvolvimentu lokál iha área infraestrutura,” nota hosi Banku afirma.

Banku Komérsiu sente ondradu ba dezenvolvimentu ne’e inklui dijitaliza sistema atendimentu fazeadamente hodi atinje objetivu hadi’a prestasaun servisu ba kliente no komunidade sira, ho lalais, seguru no benefisia individuál no negósiu sira, sai banku ne’ebé hetan fiar tanba efisiente no efetivu liu, kontribui atu sai patrosinadór ka parte importante ida iha promosaun kreximentu ekonomia no dezenvolvimentu nasionál ida ne’ebé sustentável.

Iha tinan ne’e, BNCTL sei konklui mós konstrusaun edifísiu foun iha Dili no fazeadamente konstrui edefísiu foun iha Baucau, Maliana no munisípiu sira seluk, nune’e iha tinan 2023, sukursál sira sei okupa edifísiu foun.

Sukursál Ainaro depozita kapitál millaun 4,7 hosi kliente 18.000

BNCTL nia prezensa iha Ainaro hahú kedan hosi 2009 to’o juñu 2021, tanba ne’e sukursál ne’e depozita hamutuk millaun $4,7 hosi kliente hamutuk 18.000 no rejista kréditu ativu millaun $5,5 ba kliente 13.000.

Aleinde ne’e oferese servisu seluk hanesan remesa, dijitaliza pontu entrega hanesan ATM no POS inklui fasilita kanalizasaun obrigasaun Estadu no Governu ba komunidade sira.

Iha ámbitu aniversáriu ba dala-X, BNCTL lansa produtu depozitu pensionista ne’ebé destina ba idade ativu ka idade avansadu atu rai osan atu prepara ba vida ‘era de ouro’ hafoin reforma ka la ativu ona.

Iha oportunidade ida ne’e, lansa mós kréditu pensionista ne’ebé loke oportunidade ba reformadu sira atu goza fasilidade kréditu ba kualker nesesidade, konsumtivu ka atividade negósiu.

Edifísiu foun ne’e inaugura hosi reprezentante Asionista únika BNCTL no Ministru Koordenadór Asuntu Ekonómiku (MKAE), Joaquim Amaral, akompaña hosi membru Parlamentu Nasionál no membru Governu, inklui Vise Governadora BCTL, Autoridade nasionál no lokál munisípiu Ainaro, Konsellu Administrasaun BNCTL, reprezentante kliente, no funsionáriu .

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here