Komandante Unidade Patrullamentu Fronteira (UPF), Superintendente, Euclides Belo, hala’o vizita dahuluk ba postu UPF foun iha suku Saburai. Imajen Tatoli/Sérgio da Cruz.

BOBONARO, 14 jullu 2021 (TATOLI)—Komandante Unidade Patrullamentu Fronteira (UPF), Superintendente, Euclides Belo, promete sei serbisu hamutuk ho autoridade lokál iha fronteira, hodi halo instalasaun bee moos hodi bele fornese ba postu UPF foun iha Saburai, nune’e membru sira bele utiliza.

Superintendente, Euclides Belo haree direta ona situasaun iha postu ne’e katak, bee moos laiha duni no sei esforsu atu oinsá bele instala iha fatin ne’e.

Notísia relevante:UPF kaptura Timoroan na’in-tolu tenta lori kuda sanulu ba Indonézia

“Ami ko’alia ona ho xefe suku, presija duni atu kanaliza bee moos mai iha ne’e, nune’e membru-sira bele utiliza. Informasaun hirak-ne’e ami sei kanaliza ba irarkia komandu no mós instituisaun ne’ebé ligadu ba bee moos, nune’e tempu badak bele hahú ona,” EUclides Belo hateten ba jornalista-sira, iha postu UPF Saburai, kuarta ne’e.

Nia dehan, atu asegura liña fronteira ho diak no susesu, tenki prepara kondisaun infrastrutura ne’ebé dignu, transporte no ekipamentu, inklui fasilidade nesesidade bázika ba membru-sira, automatikamente sei halo vizilánsia totál iha fronteira.

Komandante ne’e afirma, maski hasoru  difikulta barak, maibé ne’e la’ós obstákulu atu  hamate espíritu membru-sira hodi serbí no asegura soberania Timor-Leste.

“Ha’u agardese ba komandante-sira uluk ne’e, tanba bele koloka ona membru-sira iha postu. Klaru katak, distánsia entre postu-sira ne’e dook, maibé ba oin serbisu hotu-hotu tenke la’o di’ak liu, tuir motto ne’ebé sira kompromete,” nia dehan.

Xefe Suku Saburai, postu administrativu Maliana, Vicente dos Santos promete mós katak, sei kontinua esforsu serbisu hamutuk ho UPF atu fornese bee moos hosi bee matan parte aldei Kosal, nune’e membru polísia bele utilza.

Autoridade lokál ne’e informa, presija instala lalais bee moos ba postu ne’e, tanba iha fatin ne’e komunidade sempre halo transaksaun ilegál.

Durante ne’e  Membru UPF postu Saburai, utilza hela sede suku anteriór hodi hala’o serbisu, tanba konstrusaun postu foun ne’e konstrui iha 2009 to’o agora kompañia seidauk finaliza, tanba ne’e membru sira sei utiliza edifísiu Alfándega ne’ebé entrega ona ba UPF postu Saburai.

Hafoin halo Vizita ba Postu Saburai, komandante ne’e ho ekipa kontinua hala’o vizita ba postu Memu, hodi haree direta kondisaun infraestrutura no difikuldade ne’ebé membru-sira enfrenta.

Tuir planu hosi Komandante UPF, semana dahuluk sei hala’o vizta ba postu UPF iha Bobonaro laran tomak, hafoin ne’e sei kontinua ba frontreira Covalima no RAEOA.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here