Ospitál MRCCC Siloam Jakarta Indonézia. Imajen Google.

DILI, 14 jullu 2021 (TATOLI)—Pasiente Timoroan na’in-tolu mate iha Ospitál MRCCC Siloam Jakarta  Indonézia, no hosi na’in-tolu ne’e iha na’in-rua mak mate ho COVID-19.

“Pasiente na’in-tolu mak mate, iha mane ida no feto na’in-rua,” Diretór Nasionál Serbisu Apoiu Ospitalár Emerjénsia, Nilton da Silva, hateten ba jornalista Tatoli via telefónika, kuarta ne’e.

Notísia relevante:Pasiente Halo Tratamentu Saúde Iha Indonézia, Kada Loron Ema Ida Hetan 10 USD

Tuir informasaun ne’ebé parte Diresaun Nasionál Serbisu Apoiu Ospitalár Emerjénsia, simu katak, ida mate iha segunda (12/07/21),  ida mate iha sábadu (10/07/21)  no ida seluk mate iha tersa (13/07/21)

Pasiente na’in-rua ne’ebé mate ho COVID-19 haloot ona iha Indonézia tuir protokolu nasaun ne’e nian no mate-isin ida seluk posibilidade sei transporta mai Timor, maibé seidauk serteza tanba haree ba ema nia-situasaun COVID-19.

Nilton da Silva simu mós informasaun hosi adidu saúde iha Indonézia katak, pasiente na’in-tolu ne’e, ida veteranu no rua seluk ema baibain.

Ministériu Saúde simu ona karta hosi adidu saúde iha Indonézia ho Ospitál Indonezia-nian ne’ebé fó informasaun katak, ho kazu pozitivu COVID-19 ne’ebé aas, husu labele transfere lai pasiente, bainhira kazu menus mak bele halo transferénsia.

Entretantu, parte Ospitál Nasionál Guido Valadares prepara ona pasiente Timoroan na’in 12 mak atu arranka hodi halo tratamentu iha Indonézia iha tempu badak.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here