Sekertáriadu Estadu Protesaun Sivíl (SEPS), Joaquim José Gusmão dos Reis Martins. Imajen Tatoli/Francisco Sony.

DILI, 14 jullu 2021 (TATOLI)—Prosesu montajen ba sistema alerta sedu iha munisípiu Dili, la’o hela no tuir planu Sekretária Estadu Protesaun Sivíl (SEPS), sei lansa iha tinan ne’e.

“Prosesu atu monta sistema alerta sedu faze estudu tékniku hotu ona no daudaun ne’e kontinua diskusaun téknika. Hein katak, tempu besik bele lansa,’’ Sekretáriu Estadu Protesaun Sivíl (SEPS), Joaquim Gusmão, hateten ba jornalista-sira iha Suai Room Timor Plaza, kuarta ne’e.

Notísia relevante:Mercy Corps apoia SEPS ba programa reparasaun dezastre naturál

Joaquim Gusmão esplika, oras-ne’e daudaun SEPS hamutuk ho parseiru-sira halo hela preparasaun molok implementa programa ne’e, tanba ne’e sei halo hela formasaun ba pessoál-sira nune’e bele iha koñesimentu, bainhira sistema ne’e estabelese.

Tuir planu, organizasaun naun govenamentál Similie ho Mercy Corps mak sei implementa progama ne’e, serbisu hamutuk ho Diresaun Nasionál Meteorolojia Jeofízika, Institutu Jeolojia, SEPS no Sekretária Estadu Ambiente, ne’ebé sei monta sistema alerta sedu ba inundasaun iha fatin haat iha Dili, ne’ebé ameasadu tebes ba inundasaun iha tempu udan mak hanesan mota Becora, Maloa, Becusi no Kuluhun.

Sistema alerta sedu ne’e sei fó alerta ba komunidade, hodi prepara-an ho di’ak atu bele salva-an, salva sasán iha tempu udan.

Sistema ne’e ho nia aparellu sei monta mákina sensór, atu akapta informasaun-sira hanesan sura volume bee bainhira udan no bele hatene poténsia bee sa’e no bele alerta-sai bainhira komunidade iha ameasa nia laran.

Maski la temi totál fundu, maibé SEPS dehan, programa ne’e hetan apoiu finanseiru hosi Uniaun Europeia (UE) no Governu Koreanu liuhosi Ajénsia internasionál kooperasaun  Koreana (KOICA).

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here