SEJD Abrão Saldanha, kuda modo oan hosi grupu juventude Ermof iha Aileu, kinta (14/07). Imajen Tatoli/Hortencio Sanchez

AILEU, 14 jullu 2021 (TATOLI) – Sekretáriu Estadu Juventude no Desportu (SEJD), Abrão Saldanha, louva inisiativa juventude Ermof ne’ebé kria rasik servisu ba an.

Atividade ne’ebé joven grupu Ermof halo iha área agrikultura no ortikultura hahú hosi 2017 to’o ohin loron.

“Ha’u apresia ba joven na’in-13 ne’ebé foti inisiativa ba vida agrikultura, tanba sira balu lisensiadu iha universidade área agrikultura nian no balun iha ne’e nanis. Sira organiza malu hodi halo atividade kuda-modo hodi resolve ona sira-nia nesesidade,” Abrão Saldanha hateten bainhira halo observasaun ba haree rezultadu servisu grupu juventude Ermof nian iha iha Munisípiu Aileu, kuarta ne’e.

Ho inisiativa ne’ebé joven hirak ne’e iha, fó ezemplu ba joven hotu atu iha inisiativa hodi kria servisu ba an rasik no bele ajuda sosiedade sira-nia presiza.

Iha fatin hanesan koordenadór grupu juventude Ermof, Miguel Mousinho, hateten durante atividade ne’ebé sira hala’o iha 2017 to’o ohin loron rekolla ona osan hamutuk $20.000.

“Osan ne’ebé iha hosi rezultadu to’os ne’ebé ami halo, osan ne’e ami jere hodi sirkula fali ba membru sira iha grupu laran, sosa mós ami nia material produsaun sira hanesan tanke tau bee, irrigasaun sira ami halo ba modo sira no material produsaun sira hanesan tratór rasik,” nia dehan.

Nia hatutan, prosesu harii grupu ne’e tanba ekonomia família uma laran nian, tanba tinan barak família sira sai vítima ba ekonomia.

“Ho ida ne’e mak ami juventude halibur malu harii grupu ne’e iha área produtividade, hanesan ortikultura, pekuária hakiak ikan, nune’e suporta ekonomia família liu hosi osan sira ne’e,” nia hatutan.

Bainhira harii grupu ne’e joven hamutuk na’in-13 ne’e tau rasik osan kada ema  $25,00 to’o ohin loron sai boot.

To’os ne’ebé grupu ne’e halo lokaliza iha Aldeia Eraulu, Suku Liurai, Postu Administrativu Aileu Vila, Munisipiu Aileu.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here