Imajen/Mídia RAEOA-ZEESM.

OÉ-CUSSE, 14 Jullu 2021 (TATOLI)—Autoridade Rejiaun Administrativa Espesiál Oé-Cusse Ambeno (RAEOA), agradese ba Polisia Nasionál Timor-Leste (PNTL)-Unidade Patrullamentu Fronteira (UPF) tanba vijilánsia no halo prevensaun maka’as ba populasaun sira iha fronteira no halo Oé-Cusse livre hosi transmisaun lokál no transmisaun komunitária.

Prezidente Autoridade RAEOA, Arsénio Paixão Bano, apela ba Polísia Unidade Patrullamentu Fronteira no ekipa saúde iha fronteira atu halo vijilánsia maka’as hodi satan netik virus variante COVID-19 foun ne’ebé espalla iha Indonézia no hamate ema barak.

Notísia Relevante: Autoridade RAEOA: Oé-Cusse tenke livre hosi COVID-19

“Virus variante Delta COVID-19 foun ne’e, ha’u fiar katak komandante UPF ho nia membru tomak ho ekipa saúde nian halo servisu maka’as iha fronteira. Ha’u hateten ona lebele hakat liu no tama-sai ilegálmente iha fronteira. Tenke iha koordenasaun, nune’e bele prevene variante delta COVID-19 foun ne’e,” Arsénio Paixão Bano hateten liuhosi konferensia imprensa hafoin finaliza enkontru liña koordenasaun entre ekipa prevensaun COVID-19 ne’ebé hala’o iha edifisiu ZEESM, Oébau, kuarta ne’e

Atu prevene variante foun Delta ne’e labele da’et no tama iha Oé-Cusse, nia husu UPF atu hametin vijilánsia hodi hamatan ba populasaun sira labele halo transaksaun ilegál iha fronteira no bandu populasaun sira labele tama-sai fronteira.

“Iha Indonézia virus variante Delta COVID-19 ne’e da’et maka’as no iha sidade sira lockdwn tanba númeru mate sa’e maka’as. Entaun, Oé-Cusse tenke prevene no halo prevensaun ba situasaun ne’e,” nia dehan.

Tanba ne’e, nia husu ba populasaun Oé-Cusse atu hapara serimónia festa, distansiamentu sosiál, kontinua uza máskara no kumpre nafatin medida prevensaun ne’ebé Ministériu Saúde no Organizasaun Mundiál Saúde (OMS) implementa.

“Autoridade RAEOA autoriza de’it dalan ba fronteira Wini-Sakato tanba tuir protokolu COVID-19 nian,” nia dehan.

Durante ne’e, partisipasaun povu ba prevensaun COVID-19 ne’e di’ak tebes no agradese ba UPF ne’ebé halo servisu maka’as iha fronteira tanba salva ona RAEOA livre hosi transmisaun lokál no transmisaun komunitária.

Nia hato’o agradesimentu ba PNTL Oé-Cusse no UPF ne’ebé mak iha tinan ida-nia laran hamutuk ho autoridade lokál, komandante PNTL Oé-Cusse ho nia membru sira servisu hamutuk ho komunidade halo prevensaun iha fatin públiku atu prevene COVID-10 labele da’et.

Rezultadu prevensaun ne’ebé RAEOA alkansa ona mak tinan ida nia laran Oé-Cusse livre hosi COVID-19 tanba Oé-Cusse mós iha fasilidade sufisiente atu akomoda sidadaun sira-ne’ebé viajen hosi nasionál no hosi fronteira hodi kumpre uluk kuarentena obrigatoriu loron 14 mak hala’o vizita ba familia.

“Daudaun ne’e iha ona fasilidade COVID-19 nian ida iha fronteira Sakato, sub-rejiaun Pante Makasar, ida iha fronteira Oésilo sub-rejiaun Oésilo, no ida iha fronteira Abani, sub-rejiaun Pasabe, falta ida iha fronteira Naktuka sub-rejiaun Nitibe mak seidauk iha,” nia dehan.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here